विराटनगर — झापाको गौरादह नगरपालिकाका मेयर छत्रपति सुवेदीमाथि घरभित्रै दुर्व्यवहार गर्ने युवकलाई प्रहरीले पक्राउ गरी अभद्र व्यवहारअन्तर्गत मुद्दा दायर गरेको छ । 

आइतबार साँझ करिब साढे ६ बजे घरमै बसिरहेका मेयर सुवेदीमाथि गौरादह–५ राजपति चोक चप्रामारीका ३४ वर्षीय भीष्म सिटौलाले दुर्व्यवहार गरेका थिए । उनलाई प्रहरीले घटनालगत्तै पक्राउ गरेको थियो । 

मेयर सुवेदीका अनुसार सिटौलालाई व्यक्तिगत रूपमा उनी चिन्दैनन् । उनीसँग कुनै लेनदेन र पुरानो रिसइवी पनि थिएन । तर, किन दुर्व्यवहार भयो सुवेदीले बुझ्न नसकेको जनाए । उनी भर्खरै जापानबाट फर्किएका युवा हुन् । उनी केही समयदेखि सुवेदीको घर परिसरमै थिए । ‘लामो समयदेखि घरबाहिर कुर्सीमा बसिरहेको देखेपछि के काम छ भोलि आउनु नत्र प्रहरी बोलाउँछु भनेको थिएँ’, सुवेदीले भने,‘उनी त झम्टिएर आइलागे ।’