खोटाङ — हलेसी तुवाचुङ नगरपालिका–७ महादेवस्थानस्थित निर्माणाधीन नगर अस्पताल अलपत्र परेको छ । निर्माणमा संलग्न कम्पनीले खटाएको कामदारले काम छाडेर गएपछि भवन निर्माण अलपत्र परेको हो ।

हलेसी तुवाचुङ नगरपालिकाका प्रवक्ता कमल गिरीका अनुसार निर्माणमा संलग्न कम्पनीले कामदारलाई पैसा नदिएकाले छाडेर हिडेका हुन् । कामदारले गत मंसिरसम्म काम गरेको तर पैसा नपाएपछि छाडेर हिडेको गिरीले बताए ।

पूर्व प्रधानमन्त्री केपी शर्मा ओलीले देशभरका ३ सय ९६ वटा नगर अस्पताल भवन एकसाथ सिलान्यास गर्ने क्रममा उक्त भवन पनि परेको गिरीले सुनाए । उक्त भवनको निर्माण ठेक्का नमूना हिमालयन जेवी विराटनगरले लिएको हो । संघ सरकारको ११ करोड ९९ लाख १९ हजार ६ सय २९ रूपैयाँ (भ्याटबाहेक) बजेटमा २०८० साउन ७ गतेसम्म सक्नेगरी २०७८ साउन ७ गते उक्त निर्माण कम्पनीले सम्झौता गरेको थियो । 

सम्झौता अवधिमा भवन नबनेपछि पटकपटक निर्माणअवधि थपिँदै आएको छ । पछिल्लोपटक २०८२ असार २९ गते बसेको कार्यपालिकाको बैठकले तेस्रोपटक २०८३ साउन ७ गतेसम्मका लागि म्याद थप गरेको छ । उक्त भवनको बेसको पिलर मात्र उठाएको छ । अहिलेसम्म करिब ३४ प्रतिशत बराबरको ४ करोड भुक्तानी भएको हलेसी तुवाचुङ नगरपालिकाका लेखा अधिकृत नवराज कटवालले बताए । उक्त रकम सुरुको रनिङ बिलको भुक्तानी गरिएको हो । त्यसपछि कामै अलपत्र परेपछि भुक्तानी गरिएको छैन ।

भवन अलपत्र पार्ने निर्माण कम्पनीलाई कारबाही गर्नुपर्ने जग्गादाताहरूले बताएका छन् । अस्पताल बन्छ र उपचार सुविधा पाइन्छ भनेर जग्गा दिएको तर अहिलेसम्म नबकेकोप्रति दुःख लागेको जग्गादाता प्रकाशचन्द्र गिरीले बताए । काम अलपत्र पारेकोप्रति नगरपालिका, वडा र सम्वन्धित निर्माण कम्पनीलाई गुनासो राख्दा बेवास्ता गरे गिरीले दुःखेसो पोखे । यसमा संलग्नलाई कारबाही गर्नुपर्ने गिरीको माग छ । ‘अस्पताल बन्छ भनेर हामीले निःशुल्क जग्गा दिएको हो तर अहिलेसम्म अस्पताल बनेन,’ गिरीले भने, ‘नगरपालिका, वडा र सम्बन्धित ठेकेदारलाई समेत गुनासो गर्दा बेवास्ता भयो,’ गिरीले भने, ‘यसमा संलग्नलाई कारबाही हुनुपर्छ ।’