विराटनगर — कोशी प्रदेशमा पर्यटन विकासको दिशा, चुनौती र सम्भावनामाथि गहिरो बहस गर्ने उद्देश्यसहित ‘कोशी प्रदेशमा पर्यटन’ विषयक साझा संवाद कार्यक्रम सम्पन्न भएको छ।

इनोभेट नेक्स्ट इम्प्याक्टको आयोजनामा विराटनगरस्थित पर्यटन, वन तथा वातावरण मन्त्रालयको सभाहलमा आयोजित उक्त संवादमा सरकारी, निजी क्षेत्र, पर्यटन व्यवसायी, शिक्षालय तथा विद्यार्थीहरूको सहभागिता रहेको थियो।

कार्यक्रममा पर्यटन, वन तथा वातावरण मन्त्रालयका सचिव डा. इन्द्रप्रसाद सापकोटाले प्रदेश सरकारले घोषणा गरेको कोशी पर्यटन वर्ष २०८२ले कोशी प्रदेशमा पर्यटन संस्कार र संरचनागत आधार निर्माणमा महत्वपूर्ण भूमिका खेलेको उल्लेख गरे। उनले पर्यटन विकासमा निजी क्षेत्रको भूमिका निर्णायक हुने भन्दै पर्यटन वर्षले तयार पारेको आधारलाई दीगो विकासतर्फ लैजान प्रदेशसरकार प्रतिबद्ध रहेको धारणा राखे।

कोशी पर्यटन वर्ष २०८२ का सह–संयोजक भविषकुमार श्रेष्ठले कोशी प्रदेशमा हालसम्म पर्यटकको स्पष्ट र विश्वसनीय तथ्यांक नहुँदा वास्तविक अवस्था मूल्यांकन गर्न कठिन भएको स्वीकार गरे। उनले निजी क्षेत्रलाई प्राथमिकतामा राखेर प्रदेश सरकारले गरिरहेका प्रयास सकारात्मक भए पनि अब गुणात्मक पर्यटकवृद्धिका लागि नीतिगत सुधार अपरिहार्य भएको बताए।