धनकुटा — जिल्लाको पाख्रीवास नगरपालिकाले चालु आर्थिक वर्षको पहिलो चौमासिकमा २६ प्रतिशत खर्च गरेको छ । चालू आर्थिक वर्षका लागि ५९ करोड बजेट रहेको पाख्रीवास नगरपालिकाले चालु पुँजीगततर्फ ५ र  चालुतर्फ २१ प्रतिशत प्रगति हासिल गरेको फलाँटेमा सार्वजनिक सुनुवाइ गरी जानकारी दिएको हो ।

नगरपालिकाले चालुतर्फ ७ करोड ७८ लाख र १ करोड  ५ लाख पुँजीगत खर्च गरेको पाख्रीवास नगरपालिकाका प्रमुख ज्ञानबहादुर गुरुङले जानकारी दिए । चालू आर्थिक वर्षको पहिलो चौमासिकमा पाख्रीवासका १० वटा वडामा ३५ वटा उपभोक्ता समिति गठन भएका छन् । १२ वटा उपभोक्ता समितिसँग योजना सम्झौता भएको र आठवटा योजना सम्पन्न भएको नगर प्रमुख गुरुङको भनाइ छ । कार्यक्रममा पाख्रीवास नगरपालिकाले सञ्चालन गरेका योजना, सेवा प्रवाह र प्रशासनिक गतिविधिप्रति स्थानीय नागरिकबाट सुझाव र गुनासा संकलन गरिएको थियो । 

सार्वजनिक सुनुवाइमा प्रश्नकर्ताले खानेपानी व्यवस्थापन, बसाइँसराइ न्यूनीकरण, बाँदर तथा दुम्सी–बँदेलजस्ता जंगली जनावरको नियन्त्रण, सडक तथा बाटोघाटो स्तरोन्नति लगायतका सवाल उठाएका थिए । स्थानीय वीरबहादुर थापाले नगर उपप्रमुखले सरकारी गाडी र इन्धनको दुरुपयोग गरेको बारे छानबिन हुनुपर्ने माग राखेका थिए । यस्तै उनले २०७९ अघिका जनप्रतिनिधिले घरमा लगेका ल्यापटप, मोबाइल र कम्प्युटर समेत फिर्ता नगरेको जनाए ।

यस्तै रामप्रसाद दाहालले उपभोक्ता समितिलाई खरिद प्रक्रियाले समस्यामा पारेको भन्दै त्यसमा सहजीकरण गरिनुपर्ने सुझाव राखे । सार्वजनिक सुनुवाइमा उठेका जिज्ञासा र प्रश्नको जवाफ दिँदै पाख्रीवास नगरपालिकाका प्रमुख गुरुङले विगतका जनप्रतिनिधिलाई उनीहरूले प्रयोग गरेका जिन्सी सामान फिर्ता गर्न पटक-पटक पत्र लेखे पनि अटेर गरेको जनाए ।

नगर उपप्रमुख नम्रता गौतमले सामाजिक विकास, महिलाहरूको सहभागिता र सुशासन प्रवर्द्धनका कार्यक्रमलाई थप प्रभावकारी बनाइने बताइन्। प्रमुख प्रशासकीय अधिकृत सुनिल पौडेलले सार्वजनिक सुनुवाइमा उठेका विषयलाई कार्ययोजनामा समेटेर क्रमशः समाधानतर्फ अघि बढ्ने प्रतिबद्धता जनाए ।