संखुवासभा — कोशी प्रदेश मुख्य न्यायाधिवक्ताको कार्यालयले बुधबार संखुवासभा जिल्लास्थित प्रहरी हिरासत कक्ष र जिल्ला कारागारको अनुगमन गरेको छ । कारागारको भौतिक अवस्था, मानव अधिकारको स्थिति र कैदीबन्दीको जीवनयापनबारे प्रत्यक्ष जानकारी लिन अनुगमन गरिएको हो ।

अनुगमनका क्रममा जिल्ला कारागारमा क्षमताभन्दा चार गुणा बढी कैदीबन्दी राखिएको पाइएको छ । मानवीय व्यवहारमा गम्भीर प्रश्न उठाएको अनुगमन टोलीले जनाएको छ । ५५ जनाको क्षमता रहेको कारागारमा हाल १५७ जना कैदीबन्दी राखिएका छन् । तीमध्ये १४७ पुरुष, आठ महिला र दुई जना आश्रित बालबालिका रहेका छन् ।

अत्यधिक भीडका कारण खानेपानी, बसोबास र सुत्ने व्यवस्थामा गम्भीर समस्या देखिएको कैदीबन्दीले गुनासो गरेका छन् । एउटै कोठामा धेरै कैदी हुँदा पालैपालो सुत्नुपर्ने बाध्यता रहेको उनीहरूको भनाइ छ । अनुगमन टोलीले कारागार प्रशासनलाई हिरासत कक्ष र कारागारको अवस्था सुधार गर्दै मानव अधिकार संरक्षणमा विशेष ध्यान दिन निर्देशन दिएको छ । टोलीले कारागार प्रशासन, सुरक्षाकर्मी तथा हिरासत र थुनामा रहेका व्यक्तिसँग छलफलसमेत गरेको थियो ।