ताप्लेजुङ — ३१ सय मिटर उचाइमा रहेको घुन्सा आधारभूत विद्यालय फागुन १० देखि खुल्ने भएको छ।

विराटनगरमा रहेका प्रधानाध्यापक विद्यानन्द सिंहले फागुन ९ मा घुन्साको बस्तीमा पुगेर भोलिपल्टदेखि विद्यालय खुलाउने जानकारी दिए। उनको बुझाईमा विद्यार्थी भने १८/२० पछि मात्रै विद्यालय पुग्ने छन् । ‘फागुन ६ गते शेर्पा समुदायले मनाउने ल्होसार छ,’ सिंहले भने, ‘अहिलेसम्मको ट्रेण्ड हेर्दा ल्होसार मनाएपछि बल्ल फर्कने सुरसार हुन्छ । १५ गतेसम्म गाउँका मान्छे बस्तीमा पुग्ने सम्भावना देखिन्छ ।’

घुन्साका आधाभन्दा बढी मानिस यतिबेला ताप्लेजुङ बाहिर काठमाडौं, धरान, भारतको दार्जिलिङलगायतका स्थानमा छन्। ३१ सय मिटर उचाइकै अर्को बस्ती ओलाङचुङगोलाका बासिन्दा भने आधाजति बस्तीमै छन् । यहाँका बासिन्दा बस्ती नै रित्याएर बाहिर जाँदैनन् । तर चिसोयाममा खासै काम नहुने भएकाले आफन्त भेटघाटलगायतका लागि सदरमुकाम फुङलिङ, राजधानी काठमाडौंतिर जान्छन् । उनीहरु प्रायः फागुन सुरु भएपछि मात्रै फर्कन्छन् । 

जिल्लाकै उच्च स्थानमा रहेको ४२ सय मिटर उचाइको याङ्माका बासिन्दा भने गाउँमै छन्। हरेक वर्षको हिउँदयाममा चेने भन्ने स्थानमा झर्ने उनीहरुले गत वर्षदेखि बस्तीमै बस्ने अभ्यास प्रारम्भ गरेका छन् । यो वर्ष पनि उनीहरु बस्तीमै छन् ।