धरान — धरानस्थित केन्द्रीय प्राविधिक क्याम्पस हात्तीसारमा शैक्षिक तथा प्रशासनिक सुधारको माग गर्दै सुरु गरिएको विद्यार्थी धर्ना दुई महिना पुगेकाे छ।

क्याम्पसका स्ववियू सभापति पेशलराज कार्कीको नेतृत्वमा शैक्षिक तथा प्रशासनिक सुधारसहित ६ बुँदे माग राख्दै विद्यार्थीहरूले दैनिक बिहान १० बजेदेखि क्याम्पसको मुख्य गेटमा एक घण्टा धर्ना दिँदै आएका छन्।

विद्यार्थीहरूले गत कात्तिक १७ गतेदेखि क्याम्पसको व्यवस्थापन, कमजोर शैक्षिक वातावरण, पारदर्शिताको अभाव र संकाय दर्तामा देखिएको अन्योलका कारण आफ्नो भविष्य नै संकटमा परेको भन्दै आन्दोलन सुरु गरेका हुन्।

स्ववियू सभापति कार्कीका अनुसार संकाय दर्ता, शैक्षिक गुणस्तर, आर्थिक पारदर्शिता, क्याम्पस व्यवस्थापन तथा स्वास्थ्य बिमामा देखिएको अनियमितताले विद्यार्थीहरू प्रत्यक्ष रूपमा प्रभावित भएका छन्।

उनका अनुसार वर्षाौदेखि सञ्चालनमा रहेका बीएस्सी माइक्रोबायोलोजी र बीएस्सी न्यूट्रिसन एण्ड डाइटेटिक्स संकाय नेपाल हेल्थ प्रोफेसनल काउन्सिलमा हालसम्म दर्ता हुन नसक्दा विद्यार्थीहरूको भविष्य अन्योलमा परेको छ।

दुई महिनादेखि जारी धर्ना क्याम्पस सुधारको मागमा मात्र सीमित नरही नेपालमा उच्च शिक्षा, पेशागत मान्यता र राज्यको जिम्मेवारीमाथि गम्भीर प्रश्न उठाउने स्तरमा पुगेको विद्यार्थीहरूको भनाइ छ । वर्षौं अध्ययन गरेपछि पनि लाइसेन्स परीक्षा दिन नपाउने, रोजगारीबाट बञ्चित हुने अवस्थाले विद्यार्थीहरूलाई ‘मान्यता बिना डिग्री’ बोकेर बस्न बाध्य बनाएको उनीहरूको गुनासो छ ।

२०६७ सालदेखि सञ्चालनमा रहेको न्यूट्रिसन एण्ड डाइटेटिक्स संकायले १५ वर्ष बितिसक्दा पनि मान्यता नपाउनु नीतिगत कमजोरीको परिणाम भएको विद्यार्थी नेताहरूको आरोप छ। 'विश्वविद्यालयले पढाउँछ, काउन्सिलले मान्यता दिँदैन, मन्त्रालय मौन बस्छ, यस त्रिकोणीय अन्योलको मूल्य विद्यार्थीले तिर्नुपरेको छ,' सभापति कार्कीले भने ।

आन्दोलनरत विद्यार्थी आशिष कार्की भन्छन्, 'चार वर्ष लगाएर पढ्यौँ, लाखाैं खर्च गर्‍यौं, तर अन्त्यमा जागिरका लागि चाहिने लाइसेन्स नै हुँदैन ।  दुई महिनादेखि आन्दोलनमा छौं तर कुनै सुनुवाइ भएको छैन । प्रशासनले चासो देखाएको छैन।'

विद्यार्थीहरूले शैक्षिक गुणस्तरमा समेत गम्भीर लापरवाही भएको आरोप लगाएका छन्। कक्षामा नियमित उपस्थित भए पनि शिक्षकहरू समयमै नआउने, शिक्षक कक्षमै पनि भेटिन नसक्ने अवस्था सामान्य बनेको विद्यार्थी विश्वेश्वरप्रसाद बुढाले बताए । 'हामी कक्षामा बसेर कुर्छौं, तर शिक्षक न कक्षामा आउनुहुन्छ, न शिक्षक कोठामै भेटिनुहुन्छ,' उनले भने ।

यस्तै स्वास्थ्य बिमाका नाममा विद्यार्थीबाट लिइएको ५०० रुपैयाँ शुल्कबापत कुनै सेवा नपाएको भन्दै सो रकम बिना सर्त फिर्ता गर्नुपर्ने उनीहरूको माग छ।