विराटनगर — आगामी फागुन २१ गते हुने प्रतिनिधिसभा निर्वाचनका लागि कोशी प्रदेशका अधिकांश जिल्लाबाट विभिन्न दलहरूमा समानुपातिकतर्फ ठूलो संख्यामा नाम सिफारिस गरिएका थिए । तर, तीमध्ये निकै थोरै नाम मात्रै आ-आफ्ना दलहरूको अन्तिम बन्दसूचीमा परेका छन् ।

प्रदेश समितिहरूबाट सिफारिस भएका नाममध्ये अधिकांश अन्तिम सूचीबाट हटाइएका छन् । कतिपय अवस्थामा जिल्ला वा प्रदेश कुनै पनि तहबाट सिफारिस नभएका नामसमेत बन्दसूचीमा समावेश गरिएको छ ।

उदाहरणका लागि नेकपाले झापाबाट मात्रै २९ जनाको नाम समानुपातिक उम्मेदवारका रूपमा सिफारिस गरेको थियो । तर, अन्तिम बन्द सूचीमा अधिकांशको नाम काटिएको छ । झापा क्षेत्र नम्बर-२ बाट समानुपातिकतर्फ सिफारिस भएका कार्टुनिस्ट योगेश खपाङ्गीको नामसमेत बन्द सूचीमा पर्न सकेन । उनीजस्तै धेरै सिफारिस भएका नाम अन्तिम सूचीबाट बाहिरिएका छन् ।

समानुपातिक निर्वाचन प्रणालीलाई समावेशिता र अवसर वितरणको माध्यम भनिँदै आए पनि व्यवहारमा भने यो दलभित्रको शक्ति व्यवस्थापन र नेतृत्व सन्तुलनको उपकरण बन्दै गएको देखिन्छ ।

एमाले : झापाकेन्द्रित, पुरानाको पुनरावृत्ति

मुख्य दलहरूमध्ये कोशी प्रदेशबाट एमालेले सबैभन्दा धेरै नाम बन्दसूचीमा राखेको छ । अध्यक्ष केपी शर्मा ओलीको गृहजिल्ला झापाबाट उल्लेख्य संख्यामा नाम समेटिनु एमालेको सूचीको प्रमुख विशेषता बनेको छ ।

मोरङका गुरु बराल, नरेश पोखरेल, झापाका सोमनाथ पोर्तेल, जितु गौतम, मेनुका काफ्ले, नीता घतानी, अनिता कन्दङ्वा, बिनाकुमारी साह, पाँचथरकी भूमिका सुब्बा तथा उदयपुरकी मञ्जु चौधरीलगायतका नाम बन्द सूचीमा परेका छन् । 

यसअघि सांसद, मन्त्री वा पार्टीका महत्वपूर्ण जिम्मेवारी सम्हालिसकेकाहरू पुनः बन्द सूचीमा दोहोरिनुले एमालेले समानुपातिकलाई ‘अनुभवी र सुरक्षित विकल्प’ का रूपमा प्रयोग गरिरहेको संकेत गर्छ ।

पार्टीभित्र सिफारिस भएर आएका नयाँ अनुहारभन्दा अघिल्लो कार्यकालमै अवसर पाइसकेकाहरूलाई प्राथमिकता दिइनुले सूचीमा दोहोरिने प्रवृत्ति बलियो देखिएको छ । यद्यपि नीता घतानी र अनिता कन्दङ्वाजस्ता केही युवा अनुहार भने पहिलोपटक समेटिएका हुन् ।

कांग्रेस : सीमित नाम, असन्तुष्टि कायमै

कांग्रेसबाट भने कोशी प्रदेशका निकै कम नाम मात्रै बन्द सूचीमा परेका छन् । बन्दसूची प्रदेशगत रूपमा टुंग्याउने क्रममा कोशीमै विवाद चर्किएको एक नेताले बताए ।

कोशीबाट महिला कोटामा मोरङकी रुक्मिणी कोइराला, झापाकी राधा कार्की र गोमा भट्टराई, इलामकी प्रेमिका रानामगर तथा युवातर्फ सोलुखुम्बुकी गीता गुरुङको नाम बन्द सूचीमा समेटिएको छ । कांग्रेसले २०६४ यता संघ वा प्रदेशको समानुपातिक सूचीमा परिसकेकाहरूलाई यसपटक नसमेट्ने नीति लिएको दाबी गरे पनि, सीमित नामका कारण प्रदेशभित्र असन्तुष्टि भने कायमै छ ।