खोटाङ — शिक्षकहरू विद्यालय छाडेर एमाले महाधिवेशनमा गएको भन्दै कानुनी कारबाहीको माग गर्दै दुई विद्यार्थी संगठनले शिक्षा विकास तथा समन्वय इकाइ खोटाङमा ध्यानाकर्षण–पत्र बुझाएका छन् ।

दिप्रुङ चुइचुम्मा गाउँपालिका–२ डाडाँगाउँस्थित समाज सेवा आधारभूत विद्यालयका प्रधानाध्यापक अमृत थापा, उक्त गाउँपालिकाका शिक्षा शाखामा कार्यरत रणशेर तामाङ र प्रधानमन्त्री रोजगार संयोजक मुकेशकुमार गेलाल गत मंसिर २७ देखि २९ गतेसम्म काठमाडौंमा भएको एमालेको ११ औं राष्ट्रिय महाधिवेशनमा गएको भन्दै आइतबार ध्यानाकर्षण–पत्र बुझाएका हुन् ।

शिक्षा ऐन कानुन र आचारसंहिताले शिक्षक तथा कर्मचारीलाई प्रत्यक्ष रूपमा राजनीतिक गतिविधिमा संलग्न हुन निषेध गरिएको हुँदा–हुँदै एमाले महाधिवेशनमा सहभागी हुनु गम्भीर अनुशासनहीन, पेसागत मर्यादा र विद्यालयको शैक्षिक वातावरणमा नकारात्मक असर परेकाले उक्त विषयमा छानबिन गरी नियमानुसार कारबाही गर्नुपर्ने भन्दै अखिल क्रान्तिकारी र अनेरास्ववियूले संयुक्त रूपमा ध्यानाकर्षण गराएका हुन् । रणशेर तामाङले भने भेटघाट र व्यावहारिक कामको सिलसिलामा काठमाडौं गएको बताएका छन् । ‘भेटघाट र व्यावहारिक कामको सिलसिलामा काठमाडौं गएको हो,’ तामाङले भने, ‘हामी महाधिवेशन प्रतिनिधि होइनौं ।’