सुनसरी — कोशी प्रदेशमा १ लाख ५७ हजार ६१३ नयाँ मतदाता थपिएका छन् । निर्वाचन आयोगले पछिल्लो पटक गत असोज १० देखि मंसिर ५ गतेसम्मको अवधिमा कोशी प्रदेशका १४ जिल्लामा १ लाख ५७ हजार ६ सय १३ नयाँ मतदाता थपिएका हुन् । 

विभिन्न निर्वाचन कार्यालय र राष्ट्रिय परिचयपत्रको अभिलेखका आधारमा नयाँ ती मतदाता थपिएका हुन् । प्रदेश निर्वाचन कार्यालय विराटनगरका अनुसार कार्यालयमै पुगेर फोटोसहितको मतदाता नामावलीमा नाम दर्ता गर्नेको संख्या ५८ हजार ९ सय २५ जना छन् । राष्ट्रिय परिचयपत्रको अभिलेखका आधारमा ९८ हजार ६ सय ८८ मतदाता थपिएका छन् ।

यसअघि नयाँ मतदाता नामावली सङ्कलन गर्नुअघि कोशी प्रदेशमा गत असोज १० सम्म ३४ लाख ३३ हजार ९ सय मतदाता रहेका थिए । नयाँ मतदाता थपिनेमा सबैभन्दा बढी मोरङबाट ४४ हजार ४०२ जनाको नाम दर्ता भएको । त्यसपछि क्रमशः झापाबाट ३५ हजार ३ सय १९, सुनसरीबाट ३२ हजार ३ सय ८२ जना नयाँ मतदाता थपिएका छन् ।