विराटनगर — कोसी प्रदेशका विभिन्न जिल्लास्थित कारागारहरूमा पछिल्ला महिनामा लगातार कैदीबन्दीको मृत्यु भइरहेको छ। झापा, सुनसरी र मोरङका कारागारमा कैद भुक्तान गरिरहेकामध्ये साउनयता ८ जना कैदीबन्दीले ज्यान गुमाइसकेका छन् । अधिकांश मृत्यु स्वास्थ्य जटिलता, ढिलो उपचार र कारागारभित्रको भीडभाड तथा कमजोर स्वास्थ्य सेवासँग जोडिएको देखिन्छ ।

शुक्रवार बिहान झापा कारागारमा कैद भुक्तान गरिरहेका ६१ वर्षीय कर्णबहादुर लिम्बू अचानक उच्च रक्तचापका कारण अस्वस्थ भए । उनको प्रादेशिक अस्पताल भद्रपुरमा उपचारका क्रममा मृत्यु भयो ।

२४ कात्तिकमा झुम्का कारागारको ‘बी’ बन्दी गृहमा ५३ वर्षीय सुधना सरदार अचेत अवस्थामा भेटिएका थिए । इनरुवा अस्पतालमा उपचारका क्रममा उनको मृत्यु भयो । सरदार मधुमेहका नियमित औषधि सेवन गर्थे । मानव बेचबिखन मुद्दामा १० वर्षको सजाय काटिरहेका उनी झुम्कामै रहेर उपचार पाइरहेका थिए ।

मोरङ कारागारमा कात्तिक ७ र १४ मा क्रमशः दुई कैदीबन्दीको मृत्यु भयो । कारागार प्रशासनका अनुसार दुवै जनामा शरीर सुन्निने र सास फेर्न गाह्रो हुने समान लक्षण देखिएको थियो । २० वर्षीय मुस्कान दनुवार, जबरजस्ती करणी मुद्दामा १२ वर्षको कैद भोगिरहेका थिए । कोसी अस्पतालमा भर्ना भइसकेपछि उपचारका क्रममा मृत्यु भएको कारागार प्रमुख गौरव ढुंगेलले जनाए ।

३२ वर्षीय जितप्रसाद सापकोटा, लागुऔषध मुद्दामा दोषी, शरीर सुन्निने समस्या भएपछि कोसी अस्पताल हुँदै नोबेल शिक्षण अस्पतालमा भर्ना गरिएका थिए । कात्तिक ८ गते राति उनको मृत्यु भएको थियो । मोरङ कारागारमा अहिले १ हजार एक सयभन्दा बढी कैदीबन्दी छन् । साउनदेखि ६ जना कैदीबन्दीले ज्यान गुमाइसकेको कारागार प्रशासनले जनाएको छ ।