धरान — सुनसरीका विभिन्न स्थानमा पछिल्लो समय जंगली हात्तीको ठूलो समूह लगातार बस्ती र खेतबारीमा पसेपछि स्थानीय किसान आतंकित हुने गरेका छन् ।

बराहक्षेत्र नगरपालिका, रामधुनी नगरपालिका र कोशी गाउँपालिकालगायतका क्षेत्रमा पाक्न लागेकाे धानबालीमा ठूलो नोक्सानी भएको हो । बराहक्षेत्र–२, ३, ४, ५, ६ र ७ का जब्दी, सिमरवना, नडाहालगायतका क्षेत्रमा भारतबाट आएका ५० भन्दा बढी हात्ती राति–राति बस्ती छिर्दै धान, तरकारी र फलफूल बाली नष्ट गरिरहेका छन् । 

बराहक्षेत्र–२ का युवक बस्नेत, विज्ञान थापा, हेमराज बिष्टलगायतका किसानका झण्डै ५ बिघा क्षेत्रफलका धानबाली हात्तीले मिचिदिएका छन् । बस्नेत भन्छन्,‘यो वर्ष धानबाली सबै सकियो, खानका लागि चामल किन्नुपर्ने अवस्था आयो । दुई लाखभन्दा बढी क्षति भयो तर पाँच हजार क्षतिपूर्ति पनि नआउने रहेछ ।’

६५ वर्षीया दिलकुमारी लिम्बूको १० कठ्ठा धानबाली पनि हात्तीले नष्ट गरिदिएको छ । सबै प्रक्रिया पूरा गरेर निवेदन दर्ता गरे पनि उनले करिब एक वर्षपछि पाँच हजार रुपैयाँ मात्र क्षतिपूर्ति पाइन् । ‘न राहत छिटो आउँछ, न जनावर नियन्त्रण गर्न नै सरकारले पहल गर्छ’, उनले गुनासो पोखिन् ।