खोटाङ — साकेला गाउँपालिकामा बाँसकलासम्बन्धी उद्योग स्थापना गरिएको छ । गरिबी निवारणका लागि लघुउद्यम कार्यक्रमअन्तर्गत गाउँपालिका प्रमुख रविप्रकाश राईले यसको औपचारिक उद्घाटन गरेका हुन् ।

स्थानीय स्रोत र सीपलाई उपयोग गर्दै रोजगारी सिर्जना गरी आत्मनिर्भर गाउँपालिका निर्माण गर्ने उद्देश्यले उद्योग सुरु गरिएको हो । ‘लघुउद्यम र उद्योगहरूले युवालाई स्वदेशमै रोजगार दिने वातावरण सिर्जना गर्न उद्योग स्थापना गरेका छौं,’ पालिका प्रमुख राईले भने, ‘बाँसकला उद्योगले गाउँपालिकाको पहिचान र आर्थिक प्रगतिमा टेवा पुर्‍याउने छ ।’ 

यो उद्योगबाट स्थानीय युवालाई सीपमूलक तालिम प्रदान गरी बाँसका विविध उपयोगका सामग्री उत्पादन र बजार विस्तारमा सहयोग गर्ने योजना बनाइएको छ । ‘नमुना सामग्री तयार गरेर त्यसलाई अन्यत्र बजारीकरण गर्न सकियो भने आम्दानीको स्रोत बन्न सक्छ,’ बुधबार उद्योगको औपचारिक उद्घाटन गर्दै राईले भने, ‘यसका लागि नागरिक आफैँ सिर्जनशील बन्नुपर्छ, सिर्जनात्मकताको जग बसाउन सकेमात्र परिवर्तन सम्भव छ ।’