विराटनगर — मोरङको जहदा गाउँपालिकाको नयाँ बजारदेखि कटहरी गाउँपालिका हुँदै विराटनगर महानगरको सीमानासम्म करिब ६ किलोमिटर दूरी छ । हुलाकी राजमार्गको यो खण्ड सडक मार्गभन्दा पनि सास्ती मार्ग जस्तै लाग्छ ।

वर्षौंदेखि अलपत्र बनेको यो सडक पार गर्न सर्वसाधारणले दैनिक भोग्नुपरेको कष्ट भनी साध्य छैन । बर्खामा हिलो र हिउँदमा धुलोले यात्रा गर्न ज्यादै कठिन हुने गरेको स्थानीयको गुनासो छ । ‘पानी पर्दा हिलाम्य हुन्छ, घाम लाग्दा धुलोले मान्छे चिन्नै गाह्रो पर्छ,’ यो सडकबाट दैनिक यात्रा गर्ने रंगेलीका हरिशंकर मण्डलले दुखेसो पोखे, ‘वर्षौदेखि हामी यस्तै भोग्दै आएको छौं, कहिले बन्ने हो थाहा छैन ।’ 

यो सडकको निर्माण कार्य २०७६ सालमा सुरु भएको हो । तर, ६ वर्ष बितिसक्दा पनि कामको प्रगति ३० प्रतिशत माथि उक्लिन सकेको छैन । ‘हामीलाई त सरकारले सडकका नाममा सास्ती दिए जस्तो लागेको छ’, सडककै छेउमा पान पसल चलाइरहेका गणेश मण्डल भन्छन्, ‘यो सास्ती कहिलेसम्म ?’ 

उनका अनुसार बर्खाको समय यो बाटो हिडिसक्नु हुन्न । यहाँ यात्रा गर्ने धेरै मोटरसाइकल यात्रु हिलोमा चिप्लिएर घाइते भएका छन् । ‘गाडी त के, पैदल हिँड्न पनि समस्या हुन्छ’, मण्डल भन्छन् । किराना पसल गर्ने रामप्रित गनगाईका अनुसार हिलो र धुलोका कारण ग्राहकहरु किनमेलमा आउनै सक्दैनन् । ‘ग्राहक पर्खिएर दिन जान्छ’, उनी भन्छन्, ‘घर पुग्दा धुलोले चिन्नै नसक्ने अवस्था हुन्छ ।’ 

यो सडक खण्ड निर्माण गर्न हेटौंडाको श्रेष्ठ कन्स्ट्रक्सन प्रालिले २०७६ कात्तिकमा ठेक्का लिएको थियो । तर, हालसम्म निर्माणको प्रगति अत्यन्तै निराशाजनक छ । दुईपटक म्याद थप गरिए पनि निर्माण अलपत्र अवस्थामा छ । पछिल्लो समय त निर्माण कम्पनी सम्पर्कविहीन छ ।