संखुवासभा — अविरल वर्षासँगै खसेको ठूलो पहिरोका कारण उत्तरदक्षिण कोशी राजमार्ग गत एक महिनादेखि पूर्णरूपमा अवरुद्ध छ । मकालु गाउँपालिका–३ सम्माटार नेताभिर क्षेत्रमा खसेको पहिरोले करिब पाँच सय मिटर सडक बगाएपछि भोटखोला गाउँपालिकासहितका उच्च भेगसँगको सम्पर्क पूर्ण रूपमा टुटेको हो ।

भोटखोला गाउँपालिकाको बाहिरी सम्पर्क मार्ग नै सडक भएकाले गाउँपालिकाका बासिन्दा थप समस्यामा परेको भोटखोला गाउँपालिका अध्यक्ष वाङछेदर भोटेले बताए । उनले भने, 'दसैंको मुख्य चाड नजिकिँदै गर्दा सडक अवरुद्ध हुँदा जनताले आवतजावतमा मात्र होइन, अत्यावश्यक सामग्री ल्याउन र रोगीबिरामी लैजाने विषयमा समेत ठूलो समस्या भोग्नु परेको छ ।' उनका अनुसार स्थानीयहरू अहिले जीवन जोखिम मोलेर पैदल आवतजावत गर्न बाध्य भएका छन् । सडक अवरुद्ध भएपछि खाद्यान्न, इन्धन दैनिक उपभोग्य वस्तुहरूको आपूर्ति रोकिँदा अभाव देखिन थालेको छ । दसैं नजिकिँदै गर्दा चाडपर्वका लागि आवश्यक सामग्री ल्याउन नसक्दा स्थानीय व्यापारीहरू समेत चिन्तित छन् ।

सडक अवरुद्ध भएसँगै यात्रुबहाक गाडीहरू बाटोमै रोकिएका छन् उनले भने मालसामान ढुवानी गर्ने सवारीसाधन बीचमै अड्किएका कारण व्यापारी तथा उपभोक्तालाई थप मार परेको छ । पहिरो पार गर्नुपर्ने बाध्यतामा परेका स्थानीयले औषधि र आपतकालीन सामग्री पनि पाउन समस्या भएको गुनासो गरेका छन् ।