विराटनगर — भारत हालै सम्पन्न ५६ औं वस्तु तथ सेजा कर (जीएसटी) परिषद्‍को बैठकले करको दर परिमार्जन गरेको छ । विभिन्न वस्तुहरुमा ५, १८ र ४० प्रतिशतसम्म कर हेरफेर गरिएको थियो । 

जीएसटी दर परिमार्जन गर्ने निर्णयले नेपालमा प्रयोग हुने दैनिक उपभोग्य सामग्री, कच्चा पदार्थ र उद्योगधन्दामा प्रयोग हुने सरसामानमा प्रत्यक्ष असर पर्ने विराटनगरका उद्योगी व्यवसायीहरुले चिन्ता व्यक्त गरेका छन् । आगामी असोज ६ बाट यो नियम लागू हुँदैछ। 

मोरङ उद्योग वाणिज्य संघले बिहीवार विज्ञप्ति जारी गर्दै गम्भीर चासो व्यक्त गरेको छ । 'भारतको नयाँ जीएसटी व्यवस्थाले नेपाली बजारमा करिब १८ देखि ३० प्रतिशतसम्म मूल्यवृद्धि हुने सम्भावना रहेको छ', विज्ञप्तिमा भनिएको छ । 

संघका अनुसार पेट्रोलियम पदार्थ, चिनी, गहना, खाद्यान्न, वस्त्र, जुत्ता, इलेक्ट्रोनिक सामान लगायतका आयातित वस्तुहरू महँगो हुने भएकाले नेपाली उद्योग, व्यवसाय र उपभोक्ताहरूलाई प्रत्यक्ष असर पर्नेछ। संघका अनुसार नेपालले भारतबाट आयात गर्ने वस्तुहरूमा उच्च कर लागू भएपछि तस्करी बढ्ने, अवैध कारोबार तीव्र हुने र नेपाली उत्पादनमा प्रतिस्पर्धात्मक क्षमतामा गिरावट आउने सम्भावना छ। यसले विशेषगरी दैनिक उपभोग्य वस्तु, स्टेशनरी, कपडा, फुटवेयर, एफएमसीजी, इलेक्ट्रोनिक्सलगायतका क्षेत्रमा मूल्यवृद्धि र अभावको समस्या निम्त्याउने संघको दाबी छ ।