खोटाङ — भरुवा बन्दुक देखाएर असुली गर्ने कांग्रेस खोटाङका सदस्य श्यामकुमार राईलाई कारबाही गर्नुपर्ने यातायात व्यवसायीले माग गरेका छन् । 

दिक्तेल रूपाकोट मझुवागढी नगरपालिका–११ का राईले सोमबार बिहान गाडी रोकी बन्दुक देखाएर रकम मागेको भन्दै पक्राउ गरी कानुनी कारबाही गर्न मंगलबार जिल्लास्थित १४ वटा यातायात व्यवसायीले माग गरेका हुन् । उनीहरूले यातायात मजदुरको जीवन रक्षाको मागसमेत गरेका छन् । 

खोटाङ यातायात, पूर्वखोटाङ यातायात, तुवाचुङ मारतिका यातायात, खोटाङ कालिका यातायात, पब्लिक मध्यपहाडी यातायात, हलेसी खोटाङ यातायात, दिक्तेल यातायात, यलम्बर सुम्निमा यातायात, एलम्बरहाङ अटो सेवा, शुभ खोटाङ यातायात, नेपाल यातायात स्वतन्त्र मजदुर युनियन र अखिल नेपाल यातायात मजदुर संघ खोटाङले संयुक्त विज्ञप्ति जारी गरी दोषीलाई कारबाहीको माग गरेका हुन् ।