उनीहरूका अनुसार बालिकाको शवको कम्मरमुनिको भाग नाङ्गो अवस्थामा भेटिएको थियो। तर उनको शव उठाउने बेला स्थानीय जनप्रतिनिधिको उपस्थितिबिनै शव प्याकिङ गरी उठाइएको, घटनास्थलमा विज्ञ र फोरेन्सिक जनशक्तिको प्रयोग भएको, १२ वर्षकै उमेरमा डिप्रेशन वा तनावको कारण आत्महत्या गर्न सक्ने सम्भावना न्यून रहेको, टिसर्ट र सुतली डोरीको प्रयोग गरी खुट्टा टेकिएकै अवस्थामा झुण्डिएको भेटिएको जस्ता कारणहरूले बालिकाको बलात्कारपछि हत्या भएको हुन सक्ने आशंका गरिएको छ।

मृतकका आफन्तले समेत बालिकाको हत्या भएको आशंका गर्दै छानबिनको माग गर्दै भदौ १ गते प्रहरीमा जाहेरी दिएका थिए । मृतकका बुवा टेकबहादुर सार्कीले जाहेरी दिएपछि पोष्टमार्टम गरी बालिकाको शव अन्त्येष्टि गरिएको थियो। 

हलेसी तुवाचुङ नगरपालिका–१० अर्खौले स्थायी घर भएकी उनकी आमा सरिता सार्की एक भाइ छोरासहित हिङ्माङको घर मुनि डेरा लिएर बस्दै आएकी थिइन्। मृत फेला परेको घरधनी रामकुमार हिङ्माङले आफ्नै घरमा घटना घटेकाले तथ्यसत्य छानबिन गरी दोषीलाई कारबाही हुनुपर्ने बताएका छन्।