काठमाडौंमा भदौ ११ देखि १४ र इटहरीमा भदौ १६ देखि १९ सम्म शिविर सञ्चालन गरिने निर्णय कार्यपालिका बैठकले गरेको छ।
खोटाङ — दिक्तेल रूपाकोट मझुवागढी नगरपालिकाले राजधानी र तराईमा रहेका सामाजिक सुरक्षा भत्ताका लाभग्राहीलाई सेवा दिन काठमाडौं र इटहरीमा शिविर सञ्चालन गर्ने भएको छ ।
काठमाडौंमा आगामी भदौ ११ देखि १४ गतेसम्म र इटहरीमा भदौ १६ देखि १९ गतेसम्म शिविर सञ्चालन गर्ने भएको हो । नगरपालिकाका प्रवक्ता दिनेशकुमार घिमिरेका अनुसार भदौ ५ गतेको कार्यपालिकाको बैठकले काठमाडौं र इटहरीमा शिविर सञ्चालन गर्ने निर्णय गरेको हो ।
शिविरमा सामाजिक सुरक्षाभत्ताको नवीकरण लगायतका काम गरिने घिमिरेले सुनाएका छन् । काठमाडौंमा वडा नं २ का वडाअध्यक्ष ध्रुवविक्रम राई र वडा नं १४ का वडाअध्यक्ष दिनेशकुमार राई तथा इटहरीमा वडा नं ५ का वडाअध्यक्ष दिनेशकुमार घिमिरे र वडा नं ९ का वडाअध्यक्ष दिनेश कठायतको नेतृत्वमा शिविर सञ्चालन गरिने घिमिरेले सुनाए ।
‘काठमाडौं र तराईमा रहनुभएका सामाजिक सुरक्षा भत्ताका लाभगाहीलाई लक्षित गरी शिविर सञ्चालन गर्ने तयारी गरिएको हो,’ घिमिरेले भने, ‘काठमाडौंमा सिनामङ्गलको होटल जन्मभूमिमा र इटहरीमा इटहरी उपमहानगरपालिकामा शिविरको बन्दोबस्ती गरिएको छ ।’
नगरपालिकामा सामाजिक सुरक्षा भत्ता पाउने पाँच हजार ८ सय ७२ जना लाभग्राही छन् । सामाजिक सुरक्षा भत्तामा पछिल्लो चौथो त्रैमासिकमा पाँच करोड ९२ लाख २० हजार ९ सय ६० रूपैयाँ वितरण गरिएको नगरपालिकाले जनाएको छ ।
