विराटनगर — विराटनगरस्थित न्यूरो कार्डियो एण्ड मल्टिस्पेसियालिटी अस्पतालले स्वास्थ्य सेवाको २५ वर्षमा २५ लाखभन्दा बढी बिरामी लाभान्वित भएको जनाएको छ ।

बेलायतबाट अध्ययन पूरा गरी आएका डा. वीरेन्द्रकुमार विष्टले २०५७ भदौ ८ गते अस्पताल स्थापना गरेका थिए । अस्पताल आज नेपालका मात्र नभई सीमावर्ती भारतीय बिरामीहरूका लागि भरपर्दो उपचार केन्द्र बनेको छ । 

अस्पतालले स्वास्थ्य सेवामा नयाँ अध्याय कोर्दै नेपालमा नै पहिलो पटक न्यूरोलोजी ओपीडी तथा आईपीडी सेवा, पूर्वकै पहिलो न्यूरो सर्जरी, अत्याधुनिक सिटी स्क्यान, एमआरआई सेवा र क्याथल्याब सेवा सुरु गरेको हो । पछिल्लो वर्षमा नेपालकै पहिलो १२८ स्लाइस एआई पावर्ड सिटी स्क्यान मेसिन जडान गर्दै प्रविधिमा नयाँ उपलब्धि हासिल गरेको छ ।