धनकुटा — विधान महाधिवेशनलाई रचनात्मक सुझाव संकलन गर्नेसहित एक वर्षीय वैचारिक तथा सांगठनिक कार्ययोजना पारित गर्दै एमाले कोशी प्रदेश कमिटीको धनकुटाको हिलेमा जारी सातौं पूर्ण बैठक सम्पन्न भएको छ । एमाले महासचिव शंकर पोखरेलको प्रमुख आतिथ्यमा मंगलबारदेखि बैठक जारी रहेको थियो । 

बैठकले चालु आर्थिक वर्षको लागि प्रस्तावित वैचारिक, सांगठानिक तथा आर्थिक कार्ययोजनासमेत पारित गरेको एमाले कोशी प्रदेश कमिटीका प्रचार तथा प्रकाशन विभागका प्रमुख लक्ष्मण तिवारीले जानकारी दिए । यसअन्तर्गत विभिन्न १४ वटा मुख्य विषयमा केन्द्रित कार्ययोजनालाई समेत बैठकले अनुमोदन गरेको उनले बताए । 

यसैगरी, आगामी विधान महाधिवेशनका लागि तयार पारिएको मस्यौदामा रचनात्मक सुझाव संकलनका लागि मातहतका कमिटीलाई निर्देशन दिइएको छ । यसअघि प्रदेशभरिका गाउँ, नगर र जिल्ला कमिटीहरुबाट प्राप्त सुझावलाई व्यवस्थित गर्न ९ सदस्यीय विधान मस्यौदा सुझाव संकलन समितिसमेत गठन गरिएको छ । जसका लागि एमाले कोशी प्रदेश कमिटीका सचिव राजकुमार भण्डारीको संयोजकत्वमा समिति गठन गरी संकलित मस्यौदालाई एकीकृत गरि पेश गरिने जनाइएको छ । यस्तै, चालु आव २०८२–२०८३ को प्रस्तावित बजेतसमेत बैठकले स्वीकृत गरेको छ ।