विराटनगर — नेकपा (एमाले) मोरङ जिल्ला कमिटीको बिहीबार सम्पन्न बैठकको निर्णय र त्यसपछि जारी सर्कुलर फरक पाइएको छ । बैठकमा सार्वजनिक रूपमा सुनाइएका केही निर्णयहरू सर्कुलरमा उल्टाइएको भन्दै जिल्लाका केही नेताहरूले असन्तुष्टि व्यक्त गरेका छन् ।

जिल्ला सचिव सोमराज थापाद्वारा वाचन गरिएको निर्णयअनुसार, नेपाल उत्पीडित जातीय मुक्ति समाजको मोरङ इन्चार्जमा किशोर विश्वकर्माको नाम घोषणा गरिएको थियो । तर, सर्कुलरमा उक्त निर्णय उल्टाउँदै मोरङ क्षेत्र नं. ६ की क्षेत्रीय उपसंयोजक टुनाकुमारी विक ‘प्रमिला’को नाम इन्चार्जको रूपमा उल्लेख गरिएको छ । विक अध्यक्ष अजम्बर राईकै नगर सुन्दर हरैचा नगरपालिकाकी कार्यपालिका सदस्य हुन् । किशोर यसअघि पनि मुक्ति समाज मोरङको नेतृत्वमा थिए । उनलाई जिम्मेवारीविहीन बनाएर टुनाकुमारीलाई जिम्मेवारी दिइएको हो । रोचक कुरा त के भने निर्णय किशोरका नाममा भयो, सर्कुलर टुनादेवीका नाममा । 

यस्तै, प्रेस चौतारीको इन्चार्जबारे बैठकले ‘पछि मनोनयन गरिने’  निर्णय गरेको थियो । तर, सर्कुलरमा सन्तोष बान्तवाको नाम उल्लेख गरिएको छ । बान्तवा पनि अध्यक्ष अजम्बर राईकै नगरबाट हुन् र उनलाई यसपटक तीनवटा महत्वपूर्ण जिम्मेवारी दिइएको छ । जनसंगठन समन्वय संयन्त्र, प्रचार तथा प्रकाशन विभाग र प्रेस चौतारी नेपाल ।