खोटाङ — केपिलासगढी गाउँपालिकामा भिरमाहुरी फैलिन थालेको छ । वडा नम्बर-१ फेदी, ७ सुङ्देल र ६ दिप्सुङमा भिरमाहुरी फैलिएको हो । फेदीमा दुई वर्षअघि मासिन लागेको भिर माहुरी सिकार गर्न प्रतिबन्ध लगाइएपछि फैलिन थालेको वडाअध्यक्ष निरकुमार राईले बताएका छन् । 

उक्त ठाउँको विभिन्न सामुदायिक वनका भिरहरूमा माहुरी फैलिएको राईको भनाइ छ । ‘दुई वर्षअघिसम्म मासिने अवस्थामा पुगेको भिर माहुरी सिकारमा प्रतिबन्ध लगाइएपछि फैलिन थालेको छ,’ उनले भने,‘भिर माहुरीले पर्यावरणमा महत्त्वपूर्ण भूमिका निर्वाह गर्ने भएकाले दुई वर्षअघि नै सिकार गर्न प्रतिबन्ध लगाइएको हो ।’ 

त्यस्तै उक्त गाउँपालिकाकै वडा नं ७ सुङ्देलमा पनि भिर माहुरी फैलिएको छ । उक्त वडाको बुङ्बुङ्गे सामुदायिक वन, दाइलुबमा सामुदायिक वनका भिरहरूमा प्रशस्त रूपमा भिरमाहुरी फैलिएको वडाअध्यक्ष तेजकुमार राईले बताएका छन् । ‘१०-१२ वटा भिरैभरि माहुरी देखिन्छ, एउटै भिरमा १७ वटासम्म भिरमाहुरीको गोला देखिन्छ’ राईले भने,‘भिर माहुरी त कति छ कति !’