बैठक बस्न नसक्दा धरान उपमहानगरले असार १० गते बजेट प्रस्तुत गर्न सकेको थिएन । त्यसयता पटक पटक प्रयास गरे पनि बजेट निर्माणको कामले पूर्णता नपाउँदा शून्यताको अवस्थामा पुगेको हो ।

यस्तै इटहरी उपमहानगरपालिका पनि बजेट शून्यताको अवस्थामा पुगेको छ । असार १० गते उपमहानगरपालिकाका तर्फबाट उपप्रमुख संगीता कुमारी चौधरीले प्रस्तुत गरेको नीति, कार्यक्रम र बजेट पारित नहुँदा होलीडेको अवस्थामा पुगेको हो । 

स्थानीय सरकार सञ्चालन ऐनमा १० असारमा प्रस्तुत भएको नीति, कार्यक्रम र बजेट १५ दिन अर्थात असार २५ गतेसम्म दफाबार छलफल गरी पास गरिसक्नुपर्ने व्यवस्था गरिएको छ । तर, बजेट पास गर्ने विषयमा पटक–पटक नगरसभा बोलाउँदै स्थगित गरेको उपमहानगरले बुधबार बोलाइएको नगरसभाको बैठक स्थगित भएकाले इटहरी बजेट होलीडेको अवस्थामा पुगेको हो । 

इटहरी उपमहानगरपालिका नगरप्रमुख हेमकर्ण पौडेलले अनुसूची बिनाको बजेट पास गर्न खोजेपछि उपप्रमुख चौधरीले असहमति जनाएपछि बुधबारको नगरसभा अर्को सूचना जारी नभएसम्मका लागि स्थगित भएको हो । उपप्रमुख चौधरीले अनुसूची बिनाको बजेट निर्णयका लागि नगरसभामा पेश गर्न नसकिने जानकारी दिएपछि नगरसभा प्रमुखका रुपमा उपस्थिति मेयर पौडेलले इटहरीवासीको भाग्य र भविष्यमाथि राजनीति गर्न नहुने जनाउँदै सहमतिका साथ अगाडि बढ्ने विश्वास व्यक्त गर्दै अर्को सूचना जारी नभएसम्मका लागि नगरसभा स्थगित गरेका थिए ।