ताप्लेजुङ — यहाँको पर्यटकीय गन्तब्यस्थल फुङफुङे झरनाको प्रचार प्रसार गर्ने उद्देश्यले आयोजित फुङफुङे झरना पर्यटन महोत्सवमा आयोजकले सात लाख रुपैयाँ आर्जन गरेका छन् ।

मेला, महोत्सव आयोजकले हरेक वर्षजसो घाटाको विवरण प्रस्तुत गरिरहँदा यसका आयोजकले भने नगद मौज्दात रहेको र सामान पनि खरिद गरिएको जनाएका छन्।

आइतबार आयोजित पत्रकार सम्मेलनमा दिइएको जानकारी अनुसार महोत्सवमा २५ लाख ५० हजार रुपैंया संकलन भएको थियो । मिक्वाखोला गाउँपालिकाले १० लाख स्वदेशी तथा विदेशीले १४ लाख दिएका थिए भने महोत्सवको स्टलाट १ लाख ५० हजार रुपैयाँ उठेको थियो । महोत्सव आयोजक समितिका अध्यक्ष विजय साँवाले समुदाय परिचालन तथा सरसफाइमा एक लाख, यातायात व्यवस्थापनमा तीन लाख, कदर पत्रमा तीन लाख, महिला तथा पुरुष फुटबल सहितका खेलकुद कार्यक्रम तर्फ छ लाख, सांस्कृतिक कार्यक्रम तर्फ एक लाख ४३ हजार खर्च भएको बताए ।