पीडकमाथि ज्यान मार्ने उद्योग र अभद्र व्यवहारमा मुद्दा चलाउन जिल्ला प्रहरी कार्यालयमा जाहेरी दिए पनि दर्ता भएन
पाँचथर — स्थानीय चारजनाको सांघातिक आक्रमणमा परी पाँचथरको फाल्गुनन्द गाउँपालिका आङसराङकी ३६ वर्षीया सरस्वता कुरुम्बाङ गम्भीर घाइते भएकी छन् ।
उनको टाउको, ढाड, पिठ्युँ, हात र खुट्टामा चोट लागेको छ । असार १० गते बिहान भएको घटना ढिला गरी सार्वजनिक भएको हो ।
सरस्वतालाई स्थानीय २५ वर्षीया कविता आङदेम्बे र ३९ वर्षीया दमन्ता आङदेम्बेसहित ४ जनाको समूहले निर्घात कुटपिट गरेका थिए ।कुटपिटमा संलग्न दुई पुरुषको नाम भने खुलाइएको छैन । पीडकहरुले सरस्वताको घर र करेसाबारीमा सुँगुर छाडेर बारम्बार अन्नबाली खुवाउने गरेका थिए । यसो नगर्न अनुरोध गर्दा उल्टै कुटपिट गरेको पीडितका श्रीमान् राम कुरुङबाङ बताउँछन् ।
कुटपिटपछि घाइते सरस्वतालाई तत्काल उपचारका लागि पाँचथर अस्पताल ल्याइएको थियो । तर, पीडक पक्षले गाउँमै मुद्दा मिलाउने भन्दै उपचार गर्न नदिई 'डिस्चार्ज पेपर' बनाएर घरैमा बस्न बाध्य बनाएको पीडितका श्रीमान् रामले जानकारी दिए ।
‘गाउँघरको कुरा गाउँमै मिलाउनुपर्छ, मुद्दामामिलामा जान हुँदैन, उपचार खर्च हामी बेहोर्छौं भनेपछि घर फर्कायौं,' उनले भने, 'बिरामी झन् जटिल अवस्थामा पुगेपछि थप उपचारका लागि झापास्थित बीएन्डसी अस्पतालमा भर्ना गरिएको छ ।’
सामूहिक आक्रमणमा परेकी सरस्वतालाई उपचार नगरी घरमा राखिएको जानकारी पाएसँगै उनका भाइ अनुप योङहाङ र टार्जन योङहाङले थप उपचारका लागि अस्पताल पुर्याएका हुन । त्यहाँ पुर्याएकी सरस्वताको अवस्था अझै पनि जटिल रहेको अनुपले बताए । ‘थिलथिलो शरीर दुख्ने त भयो नै, खाएको खानेकुरा केही अडिँदैन, वान्ता भइरहन्छ, एमआरआई गर्दा टाउकामा चोट देखाएको छ,’ उनले भने ।
सरस्वताका श्रीमान् राम र भाइ टार्जनले पीडकहरुमाथि ज्यान मार्ने उद्योग र अभद्र व्यवहारमा मुद्दा चलाउन अनुरोध गर्दै जिल्ला प्रहरी कार्यालय पाँचथरमा बुधबार जाहेरी दिएका छन् । यद्यपि जाहेरी भने दर्ता भएको छैन ।
जिल्ला प्रहरी कार्यालय पाँचथरका प्रमुख डीएसपी कौशल बुढाथोकीले कुटपिट गर्ने पक्षलाई सम्पर्कमा बोलाइएको जानकारी दिए । जाहेरी दर्ता गरेर मुद्दा प्रक्रिया अगाडि बढाउने उनको भनाइ छ ।
