झापा — पूर्वराष्ट्रपति विद्यादेवी भण्डारीले झापाको विर्तामोडमा उद्घाटन गरेको विज्ञान तथा प्रविधि प्रदर्शनीमा ठूलो प्रचार गरेर सहभागी विद्यालयहरूलाई झुक्याइएको छ ।

शनिबारदेखि विर्तामोडस्थित देवी माविमा नेकपा एमाले विज्ञान तथा प्रविधि विभागले आयोजना गरेको विज्ञान तथा प्रविधि प्रदर्शनीका प्रतियोगीलाई पुरस्कार वितरणमा विभेद गरिएको हो । प्रथम, द्वितीय, तृतीय र चौथो स्थान प्राप्त गर्ने विद्यालयलाई क्रमशः चार लाख, तीन लाख, दुई लाख र एक लाख नगद पुरस्कार प्रदान गरिने भनी आयोजकले व्यापक प्रचार गरेको थियो ।

यसैगरी, सहभागी उत्कृष्ट २५ विद्यालयलाई २५ हजारका दरले प्रतिभा प्रोत्साहन पुरस्कार प्रदान गर्ने पनि घोषणा गरिएको थियो । जुन कार्यक्रमको उद्घाटन नै पूर्वराष्ट्रपति भण्डारीले भव्यताका साथ गरेकी थिइन् ।

प्रदर्शनीमा विद्यालयको उपस्थिति उत्साहजनक थियो । तर, प्रदर्शनीको समापन सत्रमा आयोजकले उपस्थित विद्यालयलाई झुक्याएर पुरस्कार वितरणमै विभेद गरिएको छ ।

समापनमा भने प्रथम, द्वितीय र तृतीयलाई मात्रै पुरस्कार दिइयो । घोषणाअनुसार एक लाखको चौथो पुरस्कार दिइएन ।

२५ विद्यालयलाई २५ हजारका दरले प्रतिभा प्रोत्साहन पुरस्कार दिने भनिए पनि ९ विद्यालयलाई मात्रै दिइयो । यसरी झुक्याइएपछि शिक्षक तथा विद्यार्थीहरुले आयोजकलाई घेरेका थिए । असन्तुष्ट विद्यालयका शिक्षकहरुले सामूहिक हस्ताक्षर गर्दै आयोजकलाई निवेदन नै दिए ।

प्रदर्शनीमा सहभागी फूलबारी मावि बाह्रदशी-५ का शिक्षक घनश्याम उप्रेतीले आयोजकले एक किसिमको प्रचार गरेर त्यो प्रतिबद्धतालाई पूरा नगर्नु आपत्तिजनक रहेको बताए । ‘कम्तीमा प्रोत्साहन पुरस्कार पाइन्छ भनेर विद्यार्थीले आफ्नै खर्चमा विज्ञानका विभिन्न प्रोजेक्ट तयार पारेर ल्याएका थिए । तर, आयोजकले प्रतिबद्धता गरेबमोजिम पुरस्कार दिएन । जसबाट विद्यार्थी निराश छन्,’ उनले भने, ‘प्रचार एउटा गर्ने अनि झुक्याउने ! हामीले यस विषयमा सामूहिक निवेदन नै लेखेर आयोजकलाई बुझायौं ।’