संखुवासभा — राजस्व छली गरी अवैध रुपमा यार्सागुम्बा ल्याउँदै गरेको गोप्य सूचनाका आधारमा जिल्ला प्रहरी कार्यालयले मंगलबार एकजनालाई पक्राउ गरेको छ ।
खाँदबारी नगरपालिका-३ बाट जुम्लाको सिन्जा गाँउपालिका-३ का ऐनबहादुर शाहीलाई पक्राउ गरेको प्रहरी निरीक्षक अभिषेककुमार श्रेष्ठले बताए ।
मकालु गाउँपालिका-५ नुमबाट खाँदबारीतर्फ आउँदै गरेको को १ ज २६३१ नम्बरको भाडाको बोलेरो गाडीमा राखेर ल्याइएको यार्सागुम्बासहित उनी पक्राउ परेका हुन् । उनका साथबाट झोलाभित्र लुकाइछिपाइ राखेको १ केजी ६७० ग्राम यार्सागुम्बा, २५ हजार ४३० नगद र भारतीय रुपैयाँ ७३० समेत बरामद भएको छ ।
पक्राउ परेका शाहीलाई मंगलबार डिभिजन वन कार्यालय संखुवासभामा बुझाइएको डिएसपी दक्षकुमार बस्नेतले बताए ।
