पाँचथर — हिलिहाङ गाउँपालिकाले विद्यालय केन्द्रित डेंगु नियन्त्रण अभियान सुरु गरेको छ । स्वास्थ्य शाखाको अगुवाइमा विद्यार्थी र अभिभावक केन्द्रित डेंगु नियन्त्रण अभियान सुरु भएको हो ।

अभियानमा शिक्षक विद्यार्थी र अभिभावकलाई डेंगु संक्रमण फैलने लामखुट्टेको बासस्थान, फूल पार्न सक्ने सम्भावित स्थान र नियन्त्रणका लागि अपनाउनु पर्ने सावधानी लगायत विषयमा अभिमुखीकरणसँगै लामखुट्टेका फूल र लार्भा नष्ट गर्न प्रक्रियाका विषयमा प्रयोगात्मक अभ्यास गराइँदै आएको छ ।

गाउँपालिकाका स्वास्थ्य शाखा प्रमुख चन्द्र घिमिरेका अनुसार यो गाउँपालिकामा गत वर्ष १८ जनामा डेंगु संक्रमण भएको थियो । यो महिनामा हिलिहाङ–२ की एक महिलामा संक्रमण पुष्टि भएर उपचाररत छिन् ।

विद्यालयस्तरमा गरिएका सचेतना कार्यक्रमले समुदायसम्म प्रभाव पर्ने भएकाले यस्तो कार्यक्रम सुरु गरिएको घिमिरेले बताए । उनका अनुसार हालसम्म १२ वटा विद्यालयमा अभियान सञ्चालन भइसकेको छ ।

प्रत्येक १५–१५ दिनमा यस्तो अभियान सञ्चालन गर्ने तालिका बनाइएको गाउँपालिका अध्यक्ष समरबहादुर अधिकारीले जानकारी दिए ।

खासगरी एडिज प्रजातिको लामखुट्टे डेंगुका लागि जोखिमपूर्ण हुन्छ । गर्मी एवं वर्षाको समयमा यस्तो लामखुट्टे बढी फैलन्छ । त्यसैले डेंगुबाट बच्नु भनेको यस्ता लामखुट्टेको टोकाइबाट बच्नु नै हो । किनभने यसको टोकाइ एवं संक्रमण निकै घातक हुन सक्छ ।

डेंगु एडिज जातको लामखुट्टेले पारेका फूलबाट लार्भा हुँदै विकसित भएका लामखुट्टेले मान्छेलाई टोक्दा सर्ने गर्छ । त्यसैले घर आसपासमा पानी जम्न दिनु नहुने चिकित्सकहरू सुझाव दिन्छन् ।

डेंगुको लक्षण तुरुन्तै देखिँदैन, तीनदेखि १४ दिनको अन्तरमा देखिन्छ । यसको संक्रमण भएमा एकदमै चिसो अनुभव हुने र ज्वरो आउने गर्छ । तर, आम ज्वरोभन्दा डेंगुको ज्वरो निकै तीव्र हुन्छ ।