संखुवासभा — दाहसंस्कार गर्न लागेका बेला भोटखोला गाउँपालिका-४ सिप्प्रङकी ६ वर्षिया बालिकाको शव प्रहरीले नियन्त्रणमा लिएको छ ।
बिहीबार खाँदबारी नगरपालिका–३ गुरुङचोकबाट जिल्ला प्रहरी कार्यालयका प्रहरी नायब उपरीक्षक (डिएसपी) दक्षकुमार बस्नेतको टोलीले एम्बुलेन्ससहित गोपाल तामाङकी छोरी युनिका तामाङको शव नियन्त्रणमा लिएको हो ।
वैशाख ३० गते घरासयी विवादका क्रममा जेठाजु गोपाल तामाङ र भाइबुहारी कल्पना (गुरुङ) तामाङबीच झैझगडा भएको थियो । झैझगडाका क्रममा भाइबुहारी कल्पनाले भतिजी युनिकालाई धकेल्दा डिलबाट लडेर सख्त घाइते भएकी थिइन् ।
सख्त घाइते युनिकाको जिल्ला अस्पताल संखुवासभामा उपचार हुन नसकेपछि थप उपचारका लागि नोबेल अस्पताल विराटनगर लगिएको थियो । प्रहरीका अनुसार युनिकाको नोबेल अस्पतलमा उपचारका क्रममा जेठ ७ गते बुधबार मृत्यु भएको हो ।
नियन्त्रणमा लिइएको शव जिल्ला अस्पताल संखुवासभाको शव गृहमा राखिएको प्रहरी निरीक्षक अभिषेक श्रेष्ठले बताए । प्रहरीले गोपालकी भाइबुहारी कल्पनालाई भोटखोला–४ सिप्प्रङबाट पक्राउ गरी सदरमुकाम खाँदबारी ल्याउँदै गरेको जनाएको छ ।
घटनाको बारेमा मृतकका बुबा गोपाललाई समेत नियन्त्रणमा लिएर थप अनुसन्धान भइरहेको जिल्ला प्रहरी कार्यालय संखुवासभाले जनाएको छ ।
