उदयपुर — त्रियुगा नगरपालिका–१२ बिसनपुर आसपासका स्थानीयले डम्पिङ साइटमा फोहोर फल्न नदिएपछि गाईघाट बजारबाट फोहोर उठ्न छाडेको छ । नगरपालिकाले वैशाखसम्म मात्रै बिसनपुरमा फोहोर डम्प गर्ने र जेठबाट अन्यत्र व्यवस्थापन गर्ने गरी सहमति गरेको भन्दै उनीहरुले जेठको पहिलो दिनबाटै बिसनपुरस्थित डम्पिङ साइटमा फोहोर फाल्न नदिएपछि गाईघाट बजार दुर्गन्धित बनेको छ ।

बिसनपुरमा फोहोर फाल्न जाने नगरपालिकाका सवारीसाधनलाई स्थानीयले पटकपटक अवरोध गरेपछि नगरपालिकाले केही दिन त्रियुगा नगरपालिका–१४ स्थित चप्पन जंगलमा फोहोर फालेको थियो । त्यहाँका स्थानीय र सामुदायिक वनले जंगल क्षेत्रमा फोहोर फाल्न नदिने निर्णय गरेपछि ४ दिनदेखि गाईघाट बजारबाट फोहोर उठ्न सकेको छैन । 

फोहोर व्यवस्थापनका लागि नगरपालिकाले उचित ठाउँमा डम्पिङ साइट निर्माण गर्न नसक्दा गाईघाटवासीले समस्या भोग्नुपरेको त्रियुगा नगरपालिका–११ गाईघाटका किसन राईले बताए । ‘बजारका सडक छेउमा यत्रतत्र फोहोरका थुप्रो छन्, दुर्गन्धले बजारमा हिँडिनसक्नु छैन, बिहान मर्निङ वाकमा निस्किन सकिँदैन,’ उनले भने ।

त्रियुगा नगरपालिकाका मेयर बसन्तकुमार बस्नेतले भने त्रियुगा–१३ फुलझोर र वडा नं. ६ को लालपत्ता जंगलमा नयाँ डम्पिङ साइट बनाउनका लागि अनुसन्धान भइरहेकाले फोहोरको समस्या छिट्टै समाधान हुने बताए । डम्पिङ साइटका लागि मानवबस्तीभन्दा टाढाको स्थान आवश्यक पर्ने भएकाले उपयुक्त स्थानमा जग्गा खोज्ने काम भइरहेको उनको भनाइ छ ।