उदयपुर — जिल्ला अस्पताल उदयपुरमा कार्यरत चिकित्सकलाई दुर्व्यवहार गरेको आरोपमा एक युवक पक्राउ परेका छन् ।

अस्पतालमा कार्यरत रेडियोलोजिष्ट डा. दिपेश यादवलाई सोमबार दिउँसो उनकै कार्यकक्षमा गालीगलौज गर्दै दुर्व्यवहार गरेको भन्दै प्रहरीले चौदण्डीगढी नगरपालिका–९ का ३३ वर्षीय देवराज विष्टलाई पक्राउ गरेको हो ।

‘खाजा खाएर कार्यकक्षमा प्रवेश गर्नेबित्तिकै म माथि तथानाम गाली गालीगलौज गर्दै दुर्व्यवहार गरियो,’ चिकित्सक यादवले भने । कार्यकक्षमा लात्ती हान्दै पसेका विष्टले किन ढिलो गरिस् भन्दै अपशब्द बोलेर दुर्व्यबहार गरेको उनले बताए ।

‘मेरो चेम्बर बाहिर २० जना जति बिरामी रहेछन्, म निर्धारित समयमा नै पुगेको थिएँ,’ उनले भने, ‘बिरामी हेर्न कोठाभित्र पसेर नाम बोलाउने वित्तिकै एक्कासी दुर्व्यवहार भयो ।’