सुनसरी — जिल्ला प्रशासन कार्यालय सुनसरीले सप्तकोशी नदीमा स्नान गर्न भरपर्दो व्यवस्था मिलाउन बराहक्षेत्र मन्दिर व्यवस्थापन समितिलाई निर्देशन दिएको छ । दर्शनार्थीका लागि स्नान गर्ने तटीय क्षेत्रमा भरपर्दो व्यवस्थापन गर्न प्रशासनले मन्दिर व्यवस्थापन समितिलाई निर्देशन दिएको हो ।

आज बिहान सप्तकोशी नदीमा नुहाउने क्रममा इटहरीका मामाभान्जा बेपत्ता भएको घटनालगत्तै बराहक्षेत्रस्थित नदीमा पुगेका प्रमुख जिल्ला अधिकारी धर्मेन्द्रकुमार मिश्रले व्यवस्थापन तयारी चित्तबुझ्दो नदेखिएको भन्दै २ दिन भित्रमा लिखित जवाफसहित स्पष्टीकरण पेस गर्नसमेत निर्देशन दिएका छन् ।

इटहरी-१६ बालग्राम घर भएका एकै परिवारका सदस्य मन्दिर दर्शनको लागि बराहक्षेत्र पुगेका थिए । सो क्रममा नुहाउने क्रममा १६ वर्षीय जेनिस आचार्य डुबेका थिए । उनलाई बाचाउन खोज्दा जेनिसका मामा वर्ष ४८ का नवराज बास्तोला समेत कोशी नदीमा डुब्न पुगेको थिए । परिवारका अनुसार नदीले बगाएका मामाभान्जा बेपत्ता भएका छन । बेपत्ताको खोजीमा गोताखोरसहित नेपाल प्रहरी र सशस्त्र प्रहरीको टोली परिचालन गरिएको छ ।

प्रजिअ मिश्रसहित बराहक्षेत्र मन्दिरको कोशी किनार पुगेको जिल्ला सुरक्षा समितिको टोलीले घटनापश्चात् सुरक्षाकर्मीले जारी राखेको खोज तथा उद्धार कार्यको निरीक्षणसमेत गरेको छ । घटनास्थल पुगेर वस्तुस्थितिबारे जानकारी लिएको सुरक्षा समितिले नदीमा स्थान गर्ने क्रममा अपनाउनुपर्ने सावधानीबारे व्यवस्थापन समितिले पर्याप्त कार्य गरेको नपाइएको जनाएको छ ।