खोटाङ — हलेसी तुवाचुङ नगरपालिका–११ राजापानीस्थित साप्सुखोलाबाट ६.६ मेगावाट क्षमताको जलविद्युत् आयोजनाले खोलामा पानी नछाडेको भन्दै स्थानीयले गुनासो गरेका छन् । मुहानदेखि पावर हाउससम्म खोला नै सुकाएर पानी फर्काउने गरेकाले जलचर तथा खेतीयोग्य जमिनमा असर परेको स्थानीयले गुनासो गरेका हुन् ।

खोलामा कम्तीमा १० प्रतिशत पानी छाड्नुपर्नेमा खोलै सुकाएर पानी फर्काएपछि खोलाका जलचर सखाप हुनुका साथै खेतीयोग्य जमिनमा समेत असर परेको हलेसी तुवाचुङ नगरपालिका–११ राजापानीका कुमार बुढाथोकीले बताए । उक्त जलविद्युत् आयोजनाको मुहान भएको ठाउँ बसुवादेखि पावर हाउस भएको बेलडाँडासम्म करिब ४ किलोमिटर खोलामा पानी नहुदा जलचर तथा खेतीयोग्य जमिनमा असर परेको बुढाथोकीले सुनाए । यसबारेमा गत वर्ष नै सम्बन्धित निकायको ध्यानाकर्षण गराउँदासमेत बेवास्ता गरिएको उनको भनाइ छ । ‘खोलाका चलचर त सखाप भए नै, खेतीयोग्य जमिनमा पनि असर परेको छ ।’

जलविद्युत् आयोजनाका कारण सिँचाइ कुलोको मुहान बिग्रिएपछि रेग्मीटार क्षेत्रको करिब ५० हेक्टर जमिनमा गरिने खेती प्रभावित भएको स्थानीय पुण्यप्रसाद रेग्मीले बताए । रेग्मीटार क्षेत्रमा ५६ घरपरिवारको घर तथा खेतीयोग्य जमिन छ । पानी अभावले बसाइँ सर्नुपर्ने अवस्थामा पुगेको उनको भनाइ छ । ‘रेग्मीटारको माथिल्लो ठूलो कुलोको मुहानमा पानी चढ्दैन, जलविद्युत् आयोजनाका मान्छेले प्रहरी कार्यालयमा पोहोरै फागुनभित्र कुलोमा पानी चढ्ने गरी बनाइदिन्छौं भनेर कागज गरेका थिए, बनाएनन् । यो वर्ष एक वर्षभित्रमा बनाइदिने भनेर कागज गरेको छ, ’ रेग्मीले भने ।