धनकुटा — एकै रङले सजिएका सिङ्गो बस्तीले त्यहाँ पुग्नेको मन लोभ्याउँछ । सुन्तले रंगले पोतिएका घर भएकै कारण बस्तीको नाम ओरेन्ज सिटी राखिएको छ ।
धनकुटा नगरपालिका ५ मा रहेको माथिल्लो र तल्लो कोप्चे यसरी सजाइएको हो । ६ वर्ष पहिले माथिल्लो कोप्चेबाट थालिएको समान रंगले रंगाउने अभियानले तल्लो कोप्चेलाई पनि समेटेको छ । दुवैको नाम कोप्चे ओरेन्ज सिटीको रुपमा बदलिएको छ ।
धरान–धनकुटा सडक बन्नु पहिलेको पूर्वी पहाडको मुख्य व्यापारिक केन्द्र मध्येको तल्लो र माथिल्लो कोप्चे पछिल्लो समय क्रमशः सुनसान बन्दै गएपछि स्थानीयले पुनर्जागरण अभियान थालेका छन् । यसै अभियान नयाँ वर्ष २०८२ को अवसर पारेर आइतबारदेखि तेस्रो कोप्चे उत्सव सुरु भएको छ ।
‘मौलिकता संरक्षण, पर्यटन प्रवर्द्धन’ भन्ने नाराका साथ ऐतिहासिक बिहीबारे हाटस्थलमा तीन दिनसम्म आयोजना हुने छ । उत्सवमा मौलिक नेवारी र आठपहरिया जातिको कला, संस्कृति, भेषभूषा, रहनसहन र परिकार विशेष आकर्षण रहेको महोत्सव संयोजक रिदम श्रेष्ठले बताए ।
उत्सवको मुख्य उदेश्य कोप्चे पुनर्जागरण अभियानको बारेमा जानकारी प्रदान गर्न, पर्यटन विकास मार्फत् आर्थिक सामाजिक विकास र जीवनस्तर उकास्ने प्रयास रहेको बताइएको छ ।
यस्तै, ऐतिहासिक, सांस्कृतिक तथा प्राकृतिक मौलिकताको संरक्षण र बाहृय पर्यटन केन्द्रको रुपमा विकास गर्नु रहेको उत्सवका संयोजक श्रेष्ठले बताए ।
महोत्सवमा २० स्टल रहेको छ । स्टलमा नेवारी र आठपहरिया जातिको मौलिक परिकार समावेश छ । संस्कृति संरक्षण र पर्यटन विकासका लागि अन्तर्क्रिया, सन्देशमुलक चलचित्र प्रदर्शनी, धनकुटाका पुराना तस्बिरको प्रदर्शनी तथा मनोरञ्जनात्मक खेल समेत समावेश छन् ।
उत्सवमा २० हजार पर्यटकको सहभागिता रहने आयोजकको अपेक्षा छ। ओरेन्ज सिटी नाम दिइएको तल्लो र माथिल्लो कोप्चेका डेढ सय घर सुन्तले रंगमा सजिएको अभियन्ता तथा माथिल्लो टोल बस्ती संगठनका अध्यक्ष गोविन्द राईले बताए ।
पछिल्लो समय थालिएका गतिविधिबाट पर्यटक आकर्षण बढ्न थालेको स्थानीय राम श्रेष्ठ बताउँछन् । उक्त स्थानमा दैनिक पर्यटक पुग्ने गरेका छन् ।
