खोटाङ — हलेसी तुवाचुङ नगरपालिका-१० अर्खौले नवलपुरस्थित जागरण लघुउद्यमी समूहमा आवद्ध किसानलाई दुना टपरी बुन्ने सीप विकास तालिम दिइएको छ । आर्थिक आयआर्जनसँग जोड्न उक्त तालिम दिइएको हो ।
गत चैत ३ देखि १० गतेसम्म भएको तालिममा २२ जनाले तालिम लिएको हलेसी तुवाचुङ नगरपालिकाका प्रवक्ता कमल गिरीले बताएका छन् । उक्त नगरपालिकाको वडा नम्बर-३ च्यास्मिटारमा पनि गत माघ १९ देखि २५ गतेसम्म सात दिनसम्मको दुना टपरी बनाउने तालिम दिइएको थियो ।
उक्त वडाका प्रगतिशील महिला आमा समूहका २५ जनाले तालिम लिएको हो । दुना टपरी तालिमले महिलाहरू आयआर्जनमा वृद्धि हुने नगरपालिकाकी प्रमुख विमला राईले बताएकी छन् । ‘महिलाहरूको आयआर्जनका लागि दुना–टपरी तालिम दिइएको हो,’राईले भनिन् ।
