खोटाङ — साकेला गाउँपालिका–४ मात्तिमकी ५५ वर्षीया चुना कटवालले फेरि नयाँ संसार देखिन् । तीन वर्षदेखि दुवै आँखाको ज्योति गुमाएकी  चुनाको दिक्तेलमा जारी आँखा शिविरमा चैत १० गते दुईमध्ये एउटा आँखाको मोतिविन्दुको शल्यक्रिया गरेपछि ज्योति पाएकी हुन् । 

त्यस्तै दिप्रुङ चुइचुम्मा गाउँपालिका–१ याम्खाकी ९१ वर्षीया देवीसरा राईले पनि आँखाको ज्योति पाएकी छन् । गत सात महिनादेखि दुवै आँखाको ज्योति गुमाएकी देवीसराको पनि चैत ९ गते एउटा आँखाको शल्यक्रिया गरेपछि उनले पनि आँखाको ज्योति पाएकी हुन् । अर्को आँखाको पनि चैत ११ गते शल्यक्रिया गरिएको नेपाल नेत्रज्योति संघ खोटाङका सभापति इन्द्र कसजूको भनाइ छ ।

उनीहरूसहित ९९ जनाको आँखा शल्यक्रिया गरेपछि ज्योति पाएका छन् । शिविरको पहिलो दिन ३५, दोश्रो दिन ३३ र तेश्रो दिन ३१ जनाको आँखा शल्यक्रिया गरी ज्योति पाएका हुन् । शिविर अवधिभर सात सय १२ जनाले सेवा पाएको कसजूले बताएका छन् । यसमध्ये पाँच सय ७० जनाले नि:शुल्क औषधि, दुई सय दुई जना जेष्ठ नागरिकले निःशुल्क चस्मा र आँखा शल्यक्रिया गरेका ७३ जनालाई कालो चस्मा निःशुल्क रूपमा वितरण गरिएको कसजूको भनाइ छ ।