विराटनगर — मोरङको धनपालथान गाउँपालिकाको कदमामा रहेको मुस्लिम बस्तीमा मंगलबार आगलागी हुँदा एक बालिकाको जलेर मृत्यु भएको छ । जिल्ला प्रहरी कार्यालय मोरङका अनुसार मृत्यु हुने बालिका ४ वर्षीया सुष्मा खातुन हुन् । आगलागीबाट १६ वटा घर जलेर नष्ट भएका छन् ।
स्थानीयबासी, दमकल र प्रहरीको अथक प्रयासपछि आगो नियन्त्रण भइसकेको छ । प्रहरीका अनुसार फुसका घर र परालका माच भएका कारण आगो अत्यधिक फैलिएको थियो । घटनास्थलमा राहत कार्य जारी रहेको र घटनाबारे थप अनुसन्धान भइरहेको छ ।
