ताप्लेजुङ — सरकारी प्रतिनिधि र नो केबलकार समूहद्वारा गठित समन्वय समितिको वार्ता भाँडिएपछि केबलकार निर्माण कम्पनीले पाथीभरा क्षेत्रको बाँकी रुख कटान गरेको छ । बुधबार बिहान बटम स्टेसन माथिका रुखहरु कटान गरेको कम्पनीका एक प्रतिनिधिले जनाए ।
यसअघि गत जेठको पहिलो हप्ता (१ गते) ८० प्रतिशत रुख कटान गरेको थियो । बुधबार बिहान १७ प्रतिशत कटान सकिएको र अब बटम स्टेसन आसपासका केही रुख मात्रै बाँकी रहेको छ ।
वार्ता समितिले गरेको ६ बुँदे सहमतिमा बटम स्टेसन माथिको काम नगर्ने उल्लेख थियो । तर आन्दोलनरत समूहले दोस्रो चरणको आन्दोलनका कार्यक्रम घोषणा गरेपछि रुख कटान गरिएको कम्पनीका प्रतिनिधिले बताएका छन् ।
डिभिजन वन कार्यालय ताप्लेजुङका अनुसार ठुला रुख २१ सय १४ वटामा टाँचा लगाइएको थियो । ठुला, साना, पोथ्रा, पोथ्री गरी छ हजार रुख कटान हुने उल्लेख छ । रुख कटान भएको क्षेत्रमा आन्दोलनरत समूहले वृक्षरोपणसमेत गरेको थियो भने पहिलो चरणको रुख कटानप्रति आपत्ति जनाउँदै बन्द हडताल लगायतका कार्यक्रम गरिएको थियो ।
आन्दोलनरत समूहले रुख काटिएको विषयप्रति आपत्ति जनाउँदै अब सशक्त आन्दोलन गर्ने चेतावनी दिएको छ ।
बटम स्टेसनको काम पनि जारी रहेको कम्पनीले जनाएको छ । सरकारी वार्ता टोली र नो केबलकार समूहबीच काम रोक्ने वा काम यथावत् राख्ने भन्ने विषयमा विवाद भएको थियो । उक्त विवादबीच भएको छ बुँदे सहमति पालना नगरको भन्दै नो केबलकार समूहले अहिलेको समितिसँग वार्ता गर्नुको औचित्य नरहेको निष्कर्षसहित दोस्रो चरणको आन्दोलनको कार्यक्रम घोषणा गरेको छ । उनीहरुले एक मात्र माग केबलकार खारेजी रहेकाले मन्त्रीस्तरीय भएमात्रै वार्ता गर्ने जनाएका छन् । तर सरकारले यसलाई प्राथमिकता दिएको छैन ।
आन्दोलनरत समूहले सदरमुकाम फुङलिङमा ग्लोबल आइएमई बैंकमा धर्ना दिएको छ । धर्नाका कारण बैंकले दिने सेवा प्रवाह प्रभावित भएको छ । धर्ना सुरु भएपछि बैंकले सटर बन्द गरेको थियो । आन्दोलनरत समूहको दोस्रो चरणको कार्यक्रमअन्तर्गत कोशी प्रदेशका शाखाहरुमा धर्ना दिने कार्यक्रम छ । उनीहरुले फागुन ७ गतेसम्म धर्ना, पदयात्रा, फुङलिङ नगरपालिका घेराउ लगायतका कार्यक्रम घोषणा गरेका छन् ।
