खोटाङ — केपिलासगढी गाउँपालिकामा सञ्चालित हाइड्रोपावर कम्पनीहरूले जग्गाधनीहरूलाई क्षतिपूर्ति नदिएको भन्दै संघर्ष समितिले आन्दोलनको घोषणा गरेको छ ।

सोमबार दिक्तेलमा पत्रकार सम्मेलन गरी गाउँपालिकाभित्र सञ्चालित तीव वटा हाइड्रोपावर कम्पनीहरुले तत्काल जग्गाधनीहरूलाई क्षतिपूर्ति नदिए थप चरणबद्ध आन्दोलन गर्ने घोषणा गरेको हो ।

रावा इनर्जी डेभलभमेन्ट कम्पनी लिमिटेड, हलेसी ऊर्जा कम्पनी लिमिटेड र लोवर मीड रावाखोला हाइड्रोइलोक्ट्रिक प्रोजेक्टले स्थानीय जग्गाधनीहरूलाई क्षतिपूर्ति नदिएको संघर्ष  समितिका संयोजक माइतीराज राईले बताए । 

‘हाइड्रोपावर कम्पनी मुनाफाको लागि सञ्चालन गरिएको हो, उनीहरूले स्थानीय जनतालाई मुआब्जा नदिई ठगी गरेका छन्,’ राईले भने,‘जनता ठगीमा परेको विषयमा स्थानीय सरकारलाईसमेत जानकारी गराएका थियौं, तर अहिलेसम्म कुनै सुनुवाइ भएको छैन, त्यसैले तत्काल क्षतिपूर्ति नदिए चरणबद्ध आन्दोलन गर्छौं ।’

केपिलासगढी गाउँपालिकाको विभिन्न तीन हाइड्रोपावर सञ्चालन गर्ने कम्पनीहरूले बैनास्वरूप केही रकम दिएको लामो समय बितिसक्दा समेत बाँकी रकम नपाएको जग्गाधनीहरूले गुनासो गर्दै आएकाले पीडितहरूलाई न्याय दिन संघर्ष समिति गठन गरेको राईको भनाइ छ । 

क्षतिपूर्ति नपाएका जग्गाधनीहरूले रोविन राईको संयोजकत्वमा वडास्तरीय संघर्ष समिति समेत गठन गरेको राईले जनाए । विद्युत् विकास विभागले निजी जग्गाहरू नियमअनुसार खरिद गरेर मात्र निर्माणको काम अगाडि बढाउन भनी दिएको निर्देशनसमेत हाइड्रोपावर कम्पनीहरुले पालना नगरेको संघर्ष समितिको भनाइ छ । 

रावा इनर्जी डेभलभमेन्ट कम्पनी लिमिटेडद्वारा सञ्चालित हाइड्रोपावर कम्पनीले विद्युत् उत्पादन गरेर बिक्री वितरण गरेको लामो समय बितिसक्दासमेत क्षतिपूर्ति नदिएको संघर्ष समितिले जनाएको छ । हलेसी ऊर्जा प्राइभेट लिमिटेड कम्पनी निर्माणाधीन रहेको र उक्त कम्पनीलेसमेत प्रक्रिया पूरा नगरेको संघर्ष समितिले जनाएको छ ।