काठमाडौँ — ताप्लेजुङ जिल्लाको फुङलिङ नगरपालिकाले आन्दोलन रोकेर पाथीभरा मन्दिरसम्म जाने केबलकार निर्माणमा सहयोग गर्न सबैमा अपिल गरेको छ ।

स्थानीयवासीको 'नो केबलकार समूह’ले केबलकार निर्माणमा अवरोध गर्दै आन्दोलन गरिरहेको, आन्दोलन नियन्त्रणका लागि खटिएका प्रहरी र आन्दोलनकर्ताबीच भएको झडपमा केही प्रहरी र स्थानीयवासी घाइते भएका छन् ।

यसैबीच नो केबलकार समूहले अनिश्चितकालीन मेची राजमार्ग, तमोर करिडोर र तेह्रथुमबाट ताप्लेजुङ छिर्ने सडक नाकाहरु, ताप्लेजुङभित्र यातायात बन्द, उद्योग, बैंक तथा वित्तीय संस्था, शैक्षिक संस्थाहरु बन्दको आह्वान गरेको छ । यससँगै स्थानीय जनप्रतिनिधिहरुको जिल्ला बाहिर आवतजावतमा निषेध गर्नेजस्ता कार्यहरुको फुङलिङ नगरपालिकाले घोर भर्त्सना गरेको छ ।

हडतालले बालबालिका, वृद्ध, अशक्त, सम्पूर्ण तिर्थालुहरुलाई समेत असर पर्ने र झडप हुँदा नेपालीहरुकै क्षति हुने हुँदा फुङलिङ नगरपालिकाको गम्भीर ध्यानाकर्षण भएको छ,’ नगरपालिकाको विज्ञप्तिमा भनिएको छ, 'यस नगरपालिकाको ०८१ भदौ २१ गते ४५औं कार्यपालिका बैठकको निर्णयअनुसार फुङलिङ नगरपालिका क्षेत्रभित्र तथा अन्य जिल्लाहरुबाट ताप्लेजुङसम्म आउने यातायातका साधनहरु एवं नगरपालिकाभित्र सञ्चालित बैंक तथा वित्तीय संस्था, शैक्षिक संस्थाहरु कुनै पनि राजनैतिक दल, संघसंस्था वा समूहले अवरोध तथा बन्द हडताल गर्न गराउन नपाउने निर्णय भएको छ ।’