संखुवासभा — आगलागीमा घर जलेपछि सभापोखरी गाउँपालिकाको बाह्रबिसेका लालसिंह राई छिमेकीको घरमा आश्रय लिएर बसिरहेका छन् । गत बिहीबार दिउँसो साढे २ बजेतिर एक्कासी आगोको मुस्लो देखियो । केहीबेरमै ५ वटा घर पूर्णरुपमा नष्ट भए ।

आगलागी हुँदा लालसिंह कामको सिलसिलामा ८ किलोमिटर माथिको गाउँ गएका थिए । छिमेकीले घर जलिसक्यो भन्ने खबर गरेपछि हस्याङफस्याङ उनी बाह्रबिसे आइपुग्दा घर डढेर सकिइसकेको थियो ।

‘घरधनीपुर्जा, अन्य कागजात, सुनचाँदी, लत्ताकपडा सबै जले । भित्रको केही झिक्न सकिन,’ उनले भने, ‘घरमा ताला लगाएर गाउँ गएको थिएँ। फर्किदा सर्वस्व जलिसकेछ।’ अहिले सरकारी राहत र केही संघसंस्थाको सहयोगले छाक टारिरहेको उनले बताए ।

घर आगलागी हुँदा निर्मला तामाङ पनि बाह्रबिसेमा थिइनन् । उनलाई पनि आगलागी भएपछि छिमेकीले खबर गरेका थिए । छोराछोरीको शैक्षिक प्रमाणपत्र पनि आगोमा परेर जलेको उनले बताइन् । ‘आगोले सबै थोक सकिदियो । अब घर बनाउने पैसा छैन, कतिदिन छिमेकीकोमा आश्रय लिएर बस्नु,’ उनले भनिन् ।

अग्नीपीडितलाई उद्योग वाणिज्य संघ, वितरक संघ, अलैंची व्यवसायी संघ, पेट्रोलियम ढुवानी एशोसियसन, हातेमालोलगायत संस्थाले आर्थिक सहयोग गरिरहेका छन् । आगलागीको कारण नखुलेको र ढुंगामाटो तथा काठबाट बनेका घर भएकाले क्षति बढी भएको प्रहरीको भनाइ छ । आगलागीबाट ५ परिवारको करिब २ करोड बढीको धनमाल क्षति भएको छ भने ५ घरका १७ जना विस्थापित भएका छन् । पीडितहरु हाल आफन्त र छिमेकीकोमा बसेका छन् ।