पाँचथर — किरात समुदायका लिम्बु राई, याक्खा र सुनुवार समुदायले आज नयाँ वर्ष मनाउँदै छन् ।लिम्बुहरूले नयाँ वर्षलाई 'यले तङवे' भन्ने गर्छन् किरात नयाँ वर्षलाई लिम्बु समुदायले कुसङ यले तङबे र राई समुदायले यले दङ भनेर मनाउँछन् । 

यो समुदायको नयाँ वर्ष माघे संक्रान्तिकै दिन सुरु हुन्छ । माघे संक्रान्तिसँगै किराती पात्रोमा संवत् फेरिने भएकाले माघ १ गतेकै दिन पूर्वी नेपाल थातथलो भएर देश विदेशमा पुगेका लिम्बु समुदायले किरात नयाँ वर्ष धूमधाम साथ मनाउने गरेका हुन् । किराती पात्रोअनुसार यो वर्षको माघ १ गतेदेखि किरात संवत् ५०८५ सुरु भएको छ ।

विविधताको पर्व मकर संक्रान्ति अर्थात् र माघी पर्वसँगै किरात नयाँ वर्ष सुरु हुन्छ । यस्तै याक्खा र सुनुवार समुदायका सदस्यले पनि माघ १ गतेलाई नै नयाँ वर्ष सुरु भएको भन्दै मनाउँछन् ।

किरात संवत् नेपालमा हाल प्रचलनमा रहेको विक्रम संवत् भन्दा ३ हजार ४ वर्ष जेठो छ । यले तङ्गवे संवत् किराती राजा यलम्बरले शासन सुरु गरेपछि मनाउन थालिएको किम्बदन्ती रहेको इतिहास खोज तथा अन्वेषक लक्ष्मण लावती बताउँछन् ।