विराटनगर — पूर्वको व्यस्त विराटनगर विमानस्थलमा नयाँ टर्मिनल भवन वन्दैछ । बढीमा एक वर्षभित्र करिब ६० वर्ष पुरानो टर्मिनल भवन छाडेर नयाँ टर्मिनल भवनमा स्थानान्तरण हुने बताइएको छ ।  पछिल्लो समय आन्तरिक हवाई यात्रुको बढ्दो चाप थेग्न विराटनगर  विमानस्थललाई हम्मेहम्मे पर्ने गरेको छ । 

सन् २०२१ देखि २०२४ सम्म यात्रुको चाप ५ प्रतिशतले बढेको थियो ।  सन् २०२५ देखि सन् २०३० सम्म ४ प्रतिशत र सन् २०३० देखि सन् २०३५सम्म ३ प्रतिशत यात्रु बढ्ने पूर्वानुमान नेपाल नागरिक उड्डयन प्राधिकरण (क्यान) को छ । 

प्राधिकरणले करिब ३ अर्ब १२ करोड रुपैयाँ लागतमा अत्याधुनिक र सुविधासम्पन्न टर्मिनल भवन निर्माण गरिरहेको छ । सँगै धावनमार्ग पनि  विस्तार गर्ने प्राधिकरणको योजना छ । प्राधिकरणका इन्जिनियर सञ्जीव खड्काले दुई वर्षमा करिब ४५ प्रतिशत हाराहारीमा काम सम्पन्न भइसकेको जनाए । उनका अनुसार जसमा वित्तीय प्रगति ३७ प्रतिशत मात्रै छ । 

‘आगामी २०८२ पुसभित्र निर्माण सकेर हस्तान्तरण गरिसक्ने योजना छ,’ इन्जिनियर खड्काले भने,‘त्यही कारण काम तीव्र पारिएको छ ।’ टर्मिनल भवनको शिलान्यास तत्कालीन  संस्कृति, पर्यटन तथा नागरिक उड्डयनमन्त्री सुदन किराँतीले गरेका थिए । निर्माणको ठेक्का केसी, डाँफे जेभीले पाएको छ ।  इन्जिनियर खड्काका अनुसार १६ हजार ५ सय ९० वर्ग मिटर क्षेत्रफलमा भवन निर्माण भइरहेको छ । चाँडै १ हजार ५ सय मिटर लम्बाइ र ३० मिटर चौडाइको धावनमार्गलाई लम्ब्याएर १ हजार ७ सय ७० मिटर बनाइने प्राधिकरणले जनाएको छ । ‘धावन मार्गको स्तरोन्नतीले उडानलाई थप सुरक्षित र प्रभावकारी बनाउने पक्का छ,’ खड्का भन्छन् ।