काठमाडौँ — दिप्रुङ चुइचुम्मा गाउँपालिका–१ याम्खाका राम कुँवरले यो वर्ष बगानबाटै ९ लाख रूपैयाँमा सुन्तला बेचे । गत वर्ष उनले आफैंले बजारसम्म पुर्‍याएर बेच्दा ११ लाख रूपैयाँ आम्दानी भएको थियो । गत असोज १२ गतेको बाढीले तराई झर्ने फोक्सिङटारस्थित सुनकोसी नदीको पुल बगाएपछि सिधा यातायात नहुँदा यसपाला उनले बगानबाटै सुन्तला बेचे । याम्खामा बर्षेनी सुन्तला बेचेर लाखौं कमाउनेमा उनि एक्ला छैनन् ।

स्थानीय विवेक आचार्य, देवराज आचार्य, होमराज आचार्य, काजी खत्री, कवीन्द्र राई, गणेश घिमिरे, निरबहादुर बस्नेत, पम्फामाया कुँवर, छत्रकुमार राई सबैजसोले यसपाला लाखौँ रुपैयाँको सुन्तला बेचे ।

सुन्तला उत्पादक किसानहरूको अनुमान छ, यसपाला वडा नम्बर १ मा मात्रै सुन्तला बेचेर ५० लाख भन्दा बढी भित्रियो । कृषि शाखा प्रमुख एलबी मगरले यो वर्ष कतिको सुन्तला बिक्री भयो भन्ने विस्तृत विवरण नआइसकेको बताए ।

जिल्लाभित्र सुन्तला बेचेर लाखौँ कमाउने गाउँपालिकामा दिप्रुङ चुइचुम्मा गाउँपालिका एक्लो छैन । जन्तेढुङ्गा गाउँपालिकाका कृषक जगत् किरातीले पनि यहाँका वडा नम्बर ४, ५ र ६ का दर्जनौं गाउँले लाखौँको सुन्तला बेच्ने गरे पनि यसको यकिन हिसाब आफूहरूसँग नभएको बताए । उनले भने, ‘गत वर्ष पनि यो पालिकाबाट दुई करोड बढीको सुन्तला निकासी भएको थियो । यो वर्ष पनि पोहोरको जति नै निकासी हुन्छ ।’