खोटाङ — रसुवा–पान्धारे सडक कालोपत्र सुरु भएको छ । कोशी प्रदेश भौतिक पूर्वाधार तथा स्वास्थ्यमन्त्री भूपेन्द्र राईले शनिबार औपचारिक रूपमा सुरु गरेका हुन् । 

कोशी प्रदेश भौतिक पूर्वाधार मन्त्रालयको यो योजनाअन्तर्गत खोटेहाङ गाउँपालिका–९ लिच्किराम्चेको रसुवाघाटदेखि उक्त गाउँपालिकाकै वडा नं ८ सिम्पानीसम्मको १५ किलोमिटर सडक कालोपत्र हुने खोटेहाङ गाउँपालिका अध्यक्ष उदीमबहादुर राईले बताएका छन् ।

४६ करोड ७५ लाख ९८ हजार छ सय ५७ रूपैयाँको लागतमा कालोपत्र सम्पन्न गर्ने गरी याक्थुम्हाङ–रेग्मी–चुरिया जेभीले ठेक्का लिएको छ । निर्माण कम्पनीले २०८४ साउन ६ गतेभित्र सक्ने गरी ०८१ साउन ७ गते पूर्वाधार विकास कार्यालय उदयपुरसँग सम्झौता गरेको हो ।