डोल्पा — पश्चिम रुकुमको गोतामकोटस्थित रिजिगार्ड खोलामा जलस्तर बढेर अवरुद्ध बनेको डाेल्पा जाेड्ने भेरी करिडोर सडक खुलाइएको छ। सडक खुलेसँगै डोल्पा आवतजावत गर्ने सवारीसाधन पुनः सञ्चालनमा आएका छन्।

लगातारको वर्षापछि खोलामा पानीको बहाव बढ्दा जडान गरिएको ह्युमपाइप बगेर बिहीबारदेखि सडक अवरुद्ध भएको थियो। भेरी करिडोर आयोजना कार्यालयले निरन्तर रूपमा एक्स्काभेटर परिचालन गरी अवरुद्ध सडक खुलाएको हो।

भेरी करिडोर आयोजना कार्यालयका सूचना अधिकारी गिरिश नन्दन काेरसले लगातारको प्रयासपछि सडक सञ्चालनमा ल्याउन सफल भएको बताए। उनका अनुसार पानीको बहाव केही घटेपछि खोलामा अस्थायी बाटो निर्माण गरी सवारी आवागमन सहज बनाइएको हो।

सडक अवरुद्ध हुँदा डोल्पा जाने अधिकांश सवारीसाधन रिजिगार्ड खोलाको दुवै किनारमा रोकिएका थिए। 
यात्रुहरू बीचबाटै अलपत्र परेका थिए भने मालवाहक ट्रकसमेत रोकिँदा दैनिक उपभोग्य वस्तुको ढुवानी प्रभावित भएको थियो। सडक खुलेपछि अहिले सवारीसाधन नियमित रूपमा वारपार गर्न थालेका छन्।