रुकुम पश्चिम — रुकुम पश्चिमको जिल्ला सदरमुकाम र आसपासका बजारमा खाना पकाउने एलपी ग्यासको अभाव भएको छ । 

आधा सिलिन्डर त्यो पनि मागअनुसार नपाउँदा उपभोक्ताहरु मारमा परेका छन् । विगत एक/दुई महिनायता बजारको एउटा फुटकर विक्रेताले सातामा राप्ती र मनकामना कम्पनीको ग्यास ५/५ सिलिन्डर बिक्रीका लागि पाउने गरेका छन् । आधा त्यसमा पनि सातामा ५ देखि १० सिलिन्डर पाउने भएकाले ग्राहकको मागअनुसार पुर्‍याउन मुस्किल भइरहेको खलंगा बजारका विक्रेता चन्द्रबहादुर खड्काले बताए । ‘यसपल्ट त हामीले दुई सातापछि पायौं । पसलमा आउनेवित्तिकै ग्राहकको हानथाप भयो,’ उनले भने, ‘ग्यास आउनुभन्दा पहिल्यै ग्राहकहरुले पैसा बुझाउने गर्नुभएको छ । तर ग्यास नै नभएपछि हामीले कसरी पुर्‍याउने ।’

आधा सिलिन्डर ग्यासले एक महिना पनि नधान्ने भएकाले पटक–पटक किन्नु परिरहेको उपभोक्ता मिना शर्मा बताउँछिन् । ‘घरमा ग्यास सकिएको आज २ दिन भयो । बजारभरिका पसल धाइसकेँ, कतै छैन । एक ठाउँ पैसा बुझाएको छु । भोलिसम्म आउला भनेका छन्, हेरौं ।’