सुर्खेत — आगामी आर्थिक वर्षका लागि सोमबार दिउँसो ३ बजे बस्ने संसद् बैठकमा बजेट ल्याउने तयारी गरेको कर्णाली सरकारले केही आकार बढाएर बजेट ल्याउने भएको छ । चालु आर्थिक वर्षमा ३२ अर्ब ९९ करोड रुपैयाँको बजेट ल्याएको सरकारले आगामी वर्ष एकदेखि दुई अर्ब बढाएर ३३ देखि ३४ अर्बको हाराहारीमा बजेट ल्याउने अनुमान गरिएको हो । 

बजेटको आकार बढाउने तयारीका साथ प्रदेश सरकारको आर्थिक मामिला तथा योजना मन्त्रालयले गत वर्षभन्दा एक प्रतिशत बढाएर झन्डै ३२ अर्ब रुपैयाँको सिलिङ मन्त्रालयहरूलाई वितरण गरेको थियो ।

गत वर्षभन्दा संघीय सरकारले दिने अनुदान पनि बढेकाले आकार बढाएर बजेट आउने अनुमान गरिएको मन्त्रालयका एक अधिकारीले बताए । उनका अनुसार संघीय सरकारले आगामी आर्थिक वर्षका लागि १७ अर्ब २० करोड रुपैयाँको अनुदान दिएको छ । जबकी चालु आर्थिक वर्षमा १६ अर्ब ४ करोड रुपैयाँ अनुदान दिएको थियो ।

‘अनुदान पनि बढेको छ, प्रदेश सञ्चित कोषमा पनि गत वर्षभन्दा बढी रकम जम्मा हुने अनुमान छ,’ उनले भने, ‘धेरै नबढे पनि १ देखि २ अर्ब रुपैयाँ बढ्ने अनुमान गरेका छौँ ।’

मन्त्रालयका प्रवक्ता चेतनकुमार तिमिल्सेनाले आगामी वर्षका लागि संघीय सरकारले वित्तीय समानीकरणतर्फ १० अर्ब ६३ करोड, ससर्ततर्फ ५ अर्ब ४२ करोड, विशेषतर्फ ४८ करोड र समपुरक अनुदानतर्फ ६६ करोड रुपैयाँ उपलब्ध गराएको जानकारी दिए । चालु आर्थिक वर्षमा कर्णाली सरकारले राजस्व बाँडफाँटतर्फको १० अर्ब २७ करोड रुपैयाँ प्राप्त गरेको थियो ।

आगामी वर्ष पनि सोही हाराहारीमा उक्त रकम प्राप्त हुने अनुमान गर्दा वित्त हस्तान्तरणको सीमा झन्डै २७ अर्ब रुपैयाँ पुग्ने अनुमान गरिएको प्रवक्ता तिमिल्सेनाले बताए । उनका अनुसार यो आर्थिक वर्षमा प्रदेश सञ्चित कोषमा ५ देखि ७ अर्ब रुपैयाँ बचत हुने अनुमान गरिएको छ ।