१३ वर्षीया बिमला बुढा खलंगाको सडक छेउमा बसेर पदमचाल र निउरो बेच्छिन् । उनी कनिका निशा माध्यमिक विद्यालयमा अध्ययनरत छिन् । बसदाको अघिल्लो दिनमै उनी घर जान्छिन् । लगत्तै पाटनक्षेत्रमा गएर जडिबुटी ल्याएर बेच्ने गर्छिन् । उनको दैनिक कमाइ अहिले ८ सय रुपैयाँ सम्म हुने गरेको छ । 

बिदाको समय खेर फाल्नुभन्दा नजिकैको जडिबुटी संकलनमा उपयोग गरिरहेकी विमला अहिले परिवारलाई उल्टै आर्थिक सहयोग गर्छिन् । आमा–बाबुको खर्च घरमै सकिने गरेकोले आफूले आफ्नो पढाइ खर्च जुटाउन जडिबुटी बेचिरहेको सुनाइन् । उनीहरुको यो कमाइले घरपरिवारमा केही भए पनि आर्थिक भार कम हुने गरेको छ । 

उनीहरुले चोकमा बेच्न राखेको जडिबुटीहरु होटल व्यवसायी र स्थानीयले लैजान्छन् । होटल व्यवसायी नवराज श्रेष्ठले भने, ‘बालबालिकाले बिदाको समयको सही उपयोग मात्र गरिरहेका छैनन् । एक दिनमा न्यूनतम ८ सयदेखि एक हजार रुपैयाँ सम्म कमाइरहेका छन् ।’

यो खुला जंगलमा पाइने भए पनि औषधिय गुण हुने भन्दै बजारमा माग पनि अधिक हुने गरेको छ । 

पदमचाल प्रतिमुठा २० रुपैयाँ र निउरोको ५० रुपैयाँमा बिक्री हुने गरेको छ । अहिले पातारासीका दर्जन बढी बालबालिका जंगलबाट जडिबुटी ल्याएर खलंगामा बेचिरहेका छन । यो निउरो र पदमचाल जिल्लाको आठ स्थानीयतहका ६० वटै वडाका नजिकैका उच्च जंगलहरुमा पाइने गरेको छ ।